“Modelling hi ka hobby a ni a, All India Service nih erawh ka naupan lai atanga ka nih tum a ni”
- Aishwarya Sheoran
Miss India Finalist a nih hnu, modelling lamah a kal hnuah coaching kal lova a vawikhat UPSC exam hmachhawnnna inziak tling thei, IFS officer Aishwarya Sheoran chanchin hi i lo belchiang ang.
Aishwarya Sheoran hi kum 1997 March ni 11 khan Churu, Rajasthan ah a lo piang a. A pa chu Ajay Kumar Sheoran Sipai colonel (Commanding officer) a ni. A nu hi housewife niin Aishwarya Sheoran hian pianpui unau mipa pakhat a nei bawk.
ZIRNA LAMTLUANG
Sanskriti School Chaitanyapuri, New Delhi atangin high school a zo a. School a kal lai atangin naupang thiam thei leh tumruh a ni. A hmuhphak ang ang te zirchiang thin leh hriat fiah tum tlat thin a ni. Pawl 12 ah mark 97.5% hmuin topper a ni a. College chu India ram a college tha leh lar tak Sri Ram college Delhi atangin a graduate a. IIM Indore-ah zirna chhunzawm tura thlan nimahse UPSC lam atan inbuatsaih a thlang ta zawk a ni.
MODELLING LAMTLUANG
A nu Suman Sheorin hian Aishwarya Rai a ngaisang hle a, a fanu hmingah pawh Aishwary Rai hming chawiin a phuah a, miss India ni ngei turin a duh hle thin. Kum 2014 khan beauty contest-ah te inlanin Kum 2015 khan Miss Delhi atan thlan a ni a. kum 2016 khan Femina Miss India thlanna ah Final round te a lo lut tawh bawk. Tin, Bombay Times Fashion week ah te, Lakme Fashion Week leh Amazon Fashion Week lamah te a lo in lan ve zak zak tawh a. Magazine hrang hrangah te pawh a thlalak a chuang hnem ve hle thin.
UPSC LAMTLUANG
Modelling lamah mihriat hlawh viau tawh mahse naupan lai atanga a nih chak leh a tum ber hlen turin kum 2018 May thla khan modelling lam chawlh sanin UPSC exam turin a inbuatsaih tan a. Coaching class pangngai kal lovin, Mahesh Bhawat IPS chu a mentor niin ani kaihhruaina hnuaiah hian a inbuatsaih a. Kum 2019 khan UPSC exam in August ni 4, 2020 result chhuak ah khan All India rank ah 93-na niin All India Service turin he model hi a inziak tling a ni.
Nula hmeltha leh lehkha thiam, vawikhat UPSC exam na a hlawhtling thei Miss Aishwary Sheoran-i hian a lehkha zir dan heti hian a sawi, “10+8+6 ( Darkar 10 lehkha zir, darkar 8 mut leh darkar 6 thil dang dang tih nan) formula hmangin ka inbuatsaih a, rilru la peng thei Social media platform te ka off vek a, rilru leh tih tak zetin ka inbuatsaih a ni” tiin a sawi.
TALENT PEIPUN
Pathianin mi tin hnenah talent min pe theuh a, a hai chhuak thiam apiang te, ti pung peih leh a kawng hria apiangte hi mi vannei, mi hlawhtling kan tih te chu an ni. Kristian kan nih avangin Pathianin kan talent min hai chhuah sak ringawt bik dawn lo. Thawhrimna, taimakna, dikna te hi kan sut tlang tur a ni si.
[News hrang hrangah IAS angin ziah ni mahse, amah hi chuan a profile-ah Indian Foreign Service (IFS) tiin a ziak thung a, MEA hnuaiah a thawk mek a ni.]
Post a Comment
He post chungchanga i ngaihdan lo sawi ve rawh: