MIZO ṬHALAI NGAIHVEN R15 V4 RUALIN RAY ZR HYBRID TLANGZARH

Aizawl | October 2, 2021: Covid-19 leng avanga harsatna an tawh laiin Thansanga and Sons Auto Division chuan Yamaha R15 thar leh Ray ZR 125 thar an tlangzarh a, ṭhalaite duh zawng a nih avangin hma an sawnpui ngei an beisei.
Ningani khan an showroom, Ramhlun North-ah sawm bik mi tlem te hmaah Mizorama Yamaha motorcycle dealer VIP Pu Robert Lalremruata leh Info Bikes hotupa Pu Vanlalmuana'n an khuh hawng a ni.


Mizorama motorcycle hralh chhuah tawh zingah ṭhalaiten R15 an lawm zual hle a, version 4.0 lei tuma hauh lawk leh ngaihven mi 200 vel an awm.
Info Bikes hotupa Muantea chuan : "2008 khan India ramah R15 tihchuah a ni a, ngainatu a ngahin thalaite duhthusam bike, motorcycle huanga danglamna thlentu a ni," a ti.
Nalh leh changkang tak a nih bakah ṭha lehzual leh filawr takin version 4.0 an siam chhuak tih sawiin : "Ama class-pui bike dangin a la neih ngai loh khawl ṭha leh changkang bika duan a ni a.
"Version 4.0 model tinah hian rider-te himna tur traction control dah vek a ni. Model sang chinah quick shifter dah tel a ni bawk a, darkar khata km 20-a chaka a tlan chinah clutch hmang lovin a chho zawngin gear lian ber aṭanga a tawp thlengin a thlak nghal vek theih a ni," a ti.
Ray ZR thar ṭhat bikna sawi bawkin : "Engine ṭha hybrid a hman avangin a hma aiin 13% velin fuat a nei zawk a, petrol a heh lo zawk dawn bawk," tiin rider tan awlsamna leh thil ṭha zawk an bilh tel bawk tih a sawi.
Thansanga and Sons Auto Division enkawltu Pu Robert-a chuan mi dang ang bawkin hri lengin an sumdawnna a nghawng a, R15 V4 leh Ray ZR Hybrid-in ngaihven a hlawh avangin ziaawm lam an pan theih a ring.
"Nikum atangin a buaithlak a, kuminah May aṭanga inkharkhip a nih bakah thla hmasa chhung pawhin dawr hawn theih hun ni kua chiah kan nei.
"Mizo ṭhalaite duh leh ngaihven hlawh tak lirthei thar hralh chhuah tur kan neih avangin kan ziaawm phah erawh kan ring a, pangngai taka thil kalpui leh mai erawh a la harsa rih ang," a ti.
Mizo ṭhalai hnathawk 50 vel an chhawr a, nikum chho aṭangin thla tina hlawh pangngai pek ziah theih a harsat thu a sawi bawk.
Thansanga and Sons Auto Division hi 2019-2020 chhunga Mizoram sorkar hnuaia chhiah, GST chhung hnem sumdawng 15 zingah an tel a ni.
YAMAHA R-15 V4 MODEL HRANG HRANG MAN (Mizoram on-road price) :
R-15 V4 M MotoGP Edition : Rs 2,01,917
R-15 V4 M Metallic Grey : Rs 1,99,838
R-15 V4 Racing Blue : Rs 1,94,635
R-15 V4 Darknight : Rs 1,90,474
R-15 V4 Metallic Red : Rs 1,89,434













Post a Comment

0 Comments