Kum tling lo khuaikhema puh James Lalramliana Sailutar atangin hnawtchhuak?

Aizawl | October 7, 2021: Sailutar khua a kumhlui lam atanga rawngbawlna chhuanlama awm tawh, James Lalramliana chu hmeichhe kum tling lo laka, mipat hmeichhiatna hmang luia puh a nih avangin Sailutar khua atanga a chhuah hnuah police ten an man.

Sailutar khua atanga thudawn danin October ni 3, 2021 Pathianni tlai khan Sailutara tleirawl ho Pathian thu a, inpawl hona neih naah tleirawl kum 14 mi pakhat chu inpuangin, James Lalramliana'n a mutpui thin thu leh zu a inpui thin thu a sawi a. Hemi avanga buaina kal zelah Sailular VC kaihruaiin, James Lalramliana chu Thawhlehni zan dar 9 vel khan Sailutar khua rap leh tawh lo turin khua atangin an hnawtchhuak a. Zan dar 10 velah motor 2 hmangin a chenpui mi 4 velte nen Aizawl lam an pan ta niin an sawi. Amah Pu James Lalramliana hi chuan an puhna chungchangah inpuanna a nei hran lo nia thudawn ani.

Thu dawn danin he thil thlen hun lai hi James Lalramliana rawngbawlna kal zelah tleirawl leh thalai engemawzat biak In chhunga ni 40 zan 40 in lama hawng thei lova an awm hunlai kha niin an sawi a, James-a hian zanah hmun thianghlim-ah a mal te tein a kalpui thin niin an sawi. Hmeichhe tleirawl hian a thu a awih loh chuan a chhungte tawngtai hlum vekah a vau niin sawi a awm bawk. He hmeichhe tleirawl hian a thiante nena Pathianthua inpawl hona an neih tum hian Pathian laka a inthiam theih thlawt loh thu sawiin a chunga thil thleng hi a sawi chhuak ta a ni.

James Lalramliana'n a khawih nia sawitu, hmeichhia chuan, Darlawn Police Station-ah FIR a thehlut a. Darlawn Police te chuan James man turin Aizawl lam nimin khan an pan a, nimin khan Aizawlah an man ta niin an sawi.

Kumin January ni 10 atang khan Sailutar khua a rawngbawlna avanga awm tawh James Lalramliana hian, "Elija maicham a lo thleng dawn" tiin a rawngbawlna hun a tawp hnuah pawh, rawngbawlna chhuanlamin a la awm chhunzawm ta zel niin an sawi a. Sailutar khuaah James Lalramliana, ngainatu engemawzat la awmin, a chet dan hmangah rinhlelhna, a awm hnuah pawh an hum thin niin thenkhat chuan an sawi a. Kohhran Biakin Sunday School-ah a awm reng thin a, September thla atang khan a thuihruai te in hnuai lamah a insuan ta niin an sawi.

- MSR