Kohhran thianghlim hotupa Dr LB Sailo boral

Aizawl | October 10, 2021: Kohhran Thianghlim hotupa- Executive Committee Chairman Dr. LB Sailo (69), Chawlhmun chu vawiin chawhnu dar 2:15 khan Ebenezer Damdawiin, Aizawlah a boral.

Dr LB Sailo hi Zunthum leh thisen sang natna vanga boral niin thudawnna chuan a tarlang.

Dr LB Sailo hi Kohhran thianhlim din tu ani a, a thih thleng hian a khaipa a la ni a, Chawlhmun (Ropaiabawk) ah Building ṭha leh mawi tak neiin chhungkua in an awm a ni.

Dr. LB Sailo hi AH&Vety Deptt. Director pension a ni.

Solomon Temple

pic by- vairagicapuccino

Solomon Temple chungchang post: https://www.exploremizoram.com/2019/06/solomons-temple.html?m=1

DR LB SAILO CHANCHIN TLANGPUI

Dr. L.B. Sailo hi kum 1952, February ni 2 khan Hnahlan khaw Lal, Vanlalnghina Sailo(L) leh Lalbiakliani Pautu(L) te inkarah a lo piang a. Pianpui unau pakua a nei. Kum 1974, January ni 3-ah Pi Lalzirliani nen inneiin, fa pali an nei bawk. 

Veterinary Doctor niin Mizoram sawrkar hnuaiah kum 1978 khan Vety Assistant Surgeon(VAS) in a lut a. Kum 2016, February ni 2-ah AH&Vety. Department Director in a pension. AH &Vety Director a nih chhung hian Mizoram tana ro tling hna tam tak thawkin a hoin an din a, a hnathawh langsar zual te chu:

1. Veterinary Polyclinic, Khatla, Aizawl.

2. Slaughter House, Mualpui.

3. INDBRO Poultry Hatchery Farm, Tanhril.

4. Regional Boar semen Station, Selesih.

5. Piglet Multiplication Farm, Thingsulthliah.

6. Microchip Implant in Mithun.

7. Vety Dispensary 49 lai a sa tha bawk.

Heng bakah hian Zoram tana ro tling hna tam tak a thawk bawk.

Dr. L.B Sailo hi naupan lai atanga Pathian tih mi a ni a. Tleirawl chhuah atang renga thusawi thiam tak, Bible pawh hre tak mai a ni a. Kum 1982 khan Mizoram-ah Krista Kraws thuchah hril turin Pathianin a rawn ko chhuak a. A thu hril laimu chu Lal Isua Kraws; Krista thihna leh thawhlehna mai ni lo, Kristaa kan thihna leh thawhlehna thu hi a ni. He a thuhril avang hian Kum 1984, January ni 1 ah Kohhran Thianghlim hi a lo piang ta a ni.

Kohhran Thianghlim rorelna sang ber Executive Committee Chairman ni lai mek a ni a. He Executive Committee hnuaiah hian Deparment hlawm lian tak tak 7 a awm a, Mizoram pum huap zovin Division hrang hrang 6 a awm leh a, heng bakah hian Group hrang hrang leh Local church hrang hrang, Cell, Wing leh Unit hrang hrang a awm leh thluah bawk.

Kum 1991 khan Pathianin Mizoram-ah Solomon's Temple sa turin a hriattir a. A sak dan tur ruangam engkim a hmuh lawk tir vek a. Tichuan kum 1996-ah lungphum phumin, kum 2017, December ni 25 khan Mizoram leh khawvel ram hrang hrang te hriatah ropui takin a hawng a ni.

Kohhran Thianghlim ten Zofa kan chipuite hnena Krista Kraws thuchah an puanchhuahna hlu tak, Zanlai Au Aw ah sermon a ziak thin a, chhiartuten an hlut thei hle. Tunah hian copy 100000(nuai khat) chuang sem chhuah mek a ni a, Hmar tawng leh Lai tawnga lehlin niin Paite tawnga lehlin leh tum mek a ni bawk. A mah awm tawhlo mahse Zanlai Au Aw-a chhuah tur sermon tam tak ziah lawk a nei teuh a. Kum tam tak chhung chu chhumlo chat lovin sem chhuah zel ala ni ang. Heng bakah hian lehkhabu 14 a ziak a, Vety lam kaihnawih lehkhabu, "I duh ber thlang rawh" tih a ziak bawk. 

Kohhran Thianghlim memberte thinlunga a tuh ngheh tlat chu; dikna, rinawmna leh thianghlimna hi a ni. Zirna a ngaisang a, Education Department hial a din bawk. Taima tur leh intodelh turin kohhran mipui a fuih nasa em em a, kan hnathawhna hmun theuh hi Lalpa Grep huan a ni tiin dikna, rinawmna leh taimakna nena eng hna pawh thawk turin kohhran mipui a fuih thin. Heng avang hian Kohhran Thianghlim thalai zingah hnathawklo, awm mai mai an vang hle.

Amah hi diabetes nei a ni a, phai lamah pawh in entirin an kal zauh zauh thin. Vanduaithlak takin a diabetes chuan a kal(Kidney) alo khawih chhe ta tlat mai a. Ni 19.12.2020 khan CMRI Hospital, Kolkata-ah kalpuiin dialysis tihna tur Catheter leh Fistula an lo vuah sak a. Tichuan ni 2.1.2021 ah Aizawl-ah rawn haw chho in, Ebenezer Hospital, Aizawl- ah dialysis a ti chhunzawm a. Tichuan zawi zawiin a taksa a chaklo tial tial a, tichuan vawiin ni 10.10.2021 chawhnu dar 2:15 khan rinawm taka a rawng a bawk sak, Krista ke bulah chatuana chawl turin min mutthilh san ta.

Amah alo mutthilh tak si-ah chuan Executive Committee Chairman thar tur chu Kohhran Thianghlim rorelna sang ber, Executive Committee chuan ala ruat ang.