HLAWH HMU TLAK LO PASTOR RUAL


     Mizote hi engmah ngaituah chiang lem lova kal mai mai ching kan ni a. Mizoramah kristianna a lo luh pawhin reiloteah a hnampumin kan Kristian puk mai a, kan hnamziate pawh kan thingthla ur ur mai a nih kha.
     Kan rinzawng te, ngaihsan zawng te, tluk loh ena kan ente lakah chuan kan tlawm thei hle a, kan chenga min dek thiam deuh tan chuan hmehpuah awl tak kan ni. Mahniin awmzia leh nghehna tak kan nei lo a ni ber ang. Khawizawnah pawh bum hi kan nuam riau zel. Kan pastor rualte hian anmahni hamthat nan kan mardekin mipuite hi min bum a ni thei tawh lo maw?
    Kan pastor-te tih awm tak thlarau bo manna camping-te chu Evangelist speaker rualte kutah kan dah ber a. Chungho chuan anmahni lansarhna tur lam khelpah chungin, anmahni thinlung thlarau tuipui zawng zawngin min han chilphul tak tak a, Pathianah aiin anmahniah te hian kan tui ta mah zawk fo awm e. Kan phul vak vak a, mahse kan han bei viau thin tak na a bul leh bal tak erawh chu kan chhuah lem lo hle thin chu a nih hi.
     Thuhriltu thenkhatin an sawi dik hmel a, thenkhatin an sawi dik loh hmel a, mipui lam chuan ding leh vei kan thliar thiam lo em em thin a, sawi dan leh ngaihdante hi a insual nuk nuk fo mai a ni. Chung hunahte chuan  mipuite chu kan intlansan ta zeng zung a, kan inhmuhmawh phah fo thin. Heng hunah takte hian kan pastor rualte hi huaisen taka zirtirtu leh kaihruaitu tur ni awm tak an nih thin vei nen, mipuite hnungah dawihdukin an tawm leh kur thin si. Engnge an tangkai na?
     Kan ram thlarau leh nun kawng kaihhruainaah hian kan pastor rual hi an nep em em reng a. Thlarau emaw,  rau lo emaw engmah hi an chang ngam lo. Engmah sawi ngam lo leh ti ngam lo ang hian an awm tlat fo. Finna pawh nei lo ang mai hi an ni. An mipuite chan hlau hian phakar takin an awm niin a lang tlat. An lan dan ber chu ngawkar thingngila ngil ve zurh ringawt ang chauh hi an ni ber mai. An phuk lova, an phak bawk hek lo a nih ber hi.
     A sahim china awm hi an thiam em em a, mite hmuh that lohna laka inven vel hi an hna lian tak a ni ringawt. Mawizuarin an tangkai lo hle tih hi thudik a ni. An mipuite tan mihring damchhung dinhmunah leh thlarau lam kaihhruaina tur pawhin tangkaina tak tak an nei mang lo tlat thin a ni.
     Mizo chu thil zirchiang mang hlei lova miin tha an lo tih chuan tha va ti ve ringawt angte, thil kalphung a nih tawh avanga kal ve ringawt te, bawl nuam tawk vel ang hi kan katnuk reng a ni. Thil reng rengah belhchian kan peih lovin belhchian pawh kan dawl lo hle reng a. Kan pastor rualte hi eng anga tangkai a, tangkai lo nge an nih? tihte hi kan tha enliam mai mai a nih hi.
     An tangkaina leh tangkai lohna pawh chhut hauh lova pastor annih avanga lo tan leh tuk ringawt pawh kan kat leh nuk ang chu. Sawisel thiang lova kan ngaihte hi sawisel an tul tak zet. Kei chuan mitthi vui, inneihna, Sacrament sem leh thildang te neuh neuh ti vel tur ringawt hi chuan kan mamawh tam viauin ka hre lo. Officer awmin an awm a, pawimawhna an insiam chawp mai mai a, mihringte hnena chhiahhlawh rawngbawl zawk tur ni awm tak an ni si.
     Kohhran leh mimal, ram tante hian tangkaina an nei tlem em em a, Pathian ram sum an tih eihektu mai mai an ni. Chuvangin, hlawh hmu tlak lo pastor rual hi engtia tih tur chi nge an nih? tih hi, in tha enliam mai mai lova kan zirchian ngai tak a ni ta in a lang a nih chu.

Post a Comment

0 Comments