FALKLAND VENGCHHUNG AH HIAN ENGTIK LAI PAWHIN I RAWN LEN LUH LEH THUT KHAWMUAN HI KAN REMTI RENG A, AMAHERAWHCHU ZU LEH RUIHHLO TELLO IN AW! - President, Falkland Branch YMA

Aizawl | October 10, 2021: YMA Falkland Veng branch, Aizawl president C Lalhmingliana chuan ngena siamin, "FALKLAND VENGCHHUNG AH HIAN ENGTIK LAI PAWHIN I RAWN LEN LUH LEH THUT KHAWMUAN HI KAN REMTI RENG A, AMAHERAWHCHU ZU LEH RUIHHLO TELLO IN AW." tiin thalai leng chhuakte a ngen.



NGENNA
A hmasa in Zoram mipui te chibai ule.
Kan hriat theuh ang in hripui in rei tak min luhchilh tawh a,he hripui kan hmachhawn mek hian ziaawm lam a pan mawh hle a ni. Chutih laiin kan sawrkar in kalphung tlem a rawn her danglam deuh in a hma ang em em ni tawh lo in tlem in a rawn thlah zalen ta a. He mi avang hian tam tak, a bik in kan thalai te hian zalen thut kan zo chiah lo niin a lang.


Kan veng Falkland hi hmun remchang (spot) a tam em em mai a. Khawi hmun remchang lai deuh a han chawlh pah a zu han in mai te hi a awlsam hle a ni. A veng neitu tan chuan luhai thlak tak mai a ni a, thenkhat pawr deuh deuh lah bo lo. Kan veng luh ka, a bik in Aizawl view bawr leh a chheh vel hi a thawveng in thut khawmuan nan te a rem hle a. Zu leh ruihhlo ti lo a len thawven pah a thut khawmuan nan a hmang an lo awm a nih chuan engtik lai pawhin kan lo dawngsawng reng thei in, rem pawh kan tihpui em em a ni. Amaherawhchu zu leh ruihhlo a tel tawh chuan veng hmai tibal thei khawp a hmun langsar a ni thung si. An thlit khawm let let na hmun (spot) atan chuan hmang lo hram se tih hi khawtlang duh dan a ni a, tlem a hmun reh lai leh biru deuh ah te an lo ti dawn a nih pawh in awm tum hram thei se kan duh hle a ni.

Helai view leh a chhehvel bawr hi Falkland veng luhka ber, a veng hming pawh mi tam tak in an hmel hriatna pawh a ni. Zan lamah te hian curfew e tilo hian buaina chinfel tur a awm fo mai te hi a veng neitu tan chuan a luhai thlak hle thin. Chuvangin nu leh pa ten kan fa te vengdang a an khawsak dan phung tur te hi kan inchah ngun a ngai hle in ka hria. Tin,ka thalai pui te pawh hetiang lai vel ah hi chuan zu leh ruihhlo ti lo hram tur in ka chah mawlh mawlh duh che u a. Veng luh ka, veng hmai lansarhna hmun ah hi chuan felfai tak a awm tur leh, thianghlim tak a leng tur che u in ka chah mawlh mawlh a che u. Thinrimna incho chhuah kher hian harsatna tam zawk a thlen thin si a. Tin zan dar 8 hnu lam a leng satliah leh rui bengchheng kan la tam fo mai hi chuan ngaihtuahna a ti thui hle.


FALKLAND VENGCHHUNG AH HIAN ENGTIK LAI PAWHIN I RAWN LEN LUH LEH THUT KHAWMUAN HI KAN REMTI RENG A, AMAHERAWHCHU ZU LEH RUIHHLO TELLO IN AW.
Sd/-
C.Lalhmingliana
President,
Falkland Branch YMA

Post a Comment

0 Comments