Durjya Dhan Chakma-in CADC CEM atanga banna thehlut

Aizawl | October 4, 2021: Chakma Autonoous District Council (CADC)-a Chief Executive Member (CEM) nilai Durjya Dhan Chakma chuan nimin khan CEM atanga banna Mizoram Larsap hnenah a thehlut.




CADC CEM DD Chakma hian Chairman kaltlangin Mizoram Governor hnenah banna hi a thehlut a. Chakma Autonomous District Council-a MDC 10 te'n CADC CEM hi ban a nih theih nan hma la turin Chairman hnenah ngenna an lo thlen tawh a ni.

CEM Durjya Dhan Chakma laka FIR theh luh a nih avang leh he FIR-a amah puhnate hi MDC tih atana mawi lo nia an ngaih avangin MDC 10 te hian CEM thutthleng zahawmna leh thianghlimna vawn nun zel a nih theih nan, Durjya Dhan Chakma hi ban a nih theih nan, Mizoram Governor hnenah thlen chhawng turin Chairman hi an ngen niin thudawn a ni.

Thudawnnain a tarlan danin, Chakma Autonomous District Council (CADC)-a MDC 10 te hian Chief Executive Member Durjya Dhan Chakma laka Chawngte Police Station-a First Information Report (FIR) theh luh a nih thu leh he FIR-ah hian CEM nihna hmang khawlova puh a nih thu CADC Chairman Mohan Chakma hnenah hian an thlen a, ban a nih theih nana hma la turin an ngen a ni.

Thudawn danin Udalthana-I khua a cheng, Vickey Chakma chuan CEM ni lai Pu Durjya Dhan Chakma lakah hian September ni 30, 2021 khan Chawngte Police Station-ah FIR a theh lut a. FIR copy leh finfiahna a theh luhte chu CADC-a political party President-te hnenah a pe bawk.

MDC-te'n Chairman hnena hekna an theh luh leh FIR copy atanga a lan danin, Vickey Chakma hian CEM Durjya Dhan Chakma chuan video call hmangin tum eng emaw zat amah biain, mipat hmeichhiatna hmanpuiah a thlem thin niin a tarlang a. Video call kal tlangin mipat hmeichhiatna hmanpui a duh theih nan mawi lo tak takin a che thin tih a sawi.

Post a Comment

He post chungchanga i ngaihdan lo sawi ve rawh:

Previous Post Next Post