Chief Minister in Synod Nursing College main building sak thar a hawng

Aizawl | October 26, 2021: Chief Minister Pu Zoramthanga chuan vawiin chawhnu khan College of Nursing, Synod Hospital, Durtlang main building sak thar chu a hawng. North Eastern Council (NEC) atanga sum hmuh Rs. 833 lakhs atanga dawn hmanga sak a ni.


Chief Minister chuan Nursing School building changtlung tak din a ni chu lawmawm a ti a. Nursing chu hna ropui tak a ni tiin, nursing school chu mahni mihring pui te tana rawngbawltu hlu tak zirlai kaihhruaina hmun zahawm tak a nih thu sawiin, zirlaite leh college enkawltute chu a duhsakna a hlan bawk.

College of Nursing Main building sak hna hi December ni 1, 2017 khan bultan niin September ni 30, 2021 khan zawh fel a ni a. Ram feet 6,240 bial (sq. ft.) a zau awhin, chhawng li (4) a sak a ni a (total floor area = 23,983 sq.ft.). NEC atanga sum hmuh hi state sawrkar chuan 10% in a do let ve a ni. A sak hna hi L.B Associates ten an thawk a. Administrative office, lecture room, laboratory, library, audio-visual room, auditorium, computer lab, etc.  awm tura ruahman a ni.

Dr. LH Thanga Singson, Director, College of Nursing, Synod Hospital chuan vawiin building thar hawnna inkhawm hi a kaihruai a. Mizoram Synod Moderator Rev. Dr. C. Lalhlira chuan building thar hlanna neiin, Dr. Lalbiakmawia Ngente, Principal Architect, LB Associates & Architecture Consultant hnen atangin building sak dan report chipchiar ngaihthlak niin Upa Lalrinmuana, Coordinator, Synod Hospital & Secretary, Mizoram Synod chuan lawmthu sawina hun a hmang a ni. 

Post a Comment

He post chungchanga i ngaihdan lo sawi ve rawh:

Previous Post Next Post