Aizawl | October 29, 2021: Tukin zing Dar 3:00 bawr vel khan Kolalian aṭanga Assam lam Km 3 vela hlaah bawng la tura kal Lalfakawma (26) S/o Hunlawmawma, Chuhvel chu Bawng lei tur nei nia inchhal hnamdang te'n an that a, bawng Lei tura kal ve tho Duhawma chu misualte hian bawng leina tura a ken pawisa cheng 1,00,000/- (Nuai khat) an lak sak bawk.
Mizo Special Report-in a tarlan dsnin, Bawng lei tuma kal Duhawma s/o Ram Moni Bawngva khuate hian, tun hmain Assam lam mite hnen atangin bawng pathum an lo leisak tawh a. Tunṭumah hian heng hnamdangte hian bawng lei tur neia insawiin an rawn be leh ta a. Nizan dar 10:00 vel khan Lalfakawma leh Duhawma te hian bawng lei tumin Bawngva khua aṭangin Scooty hmangin Zamuang an pan a. Bawng phurhna atana hman tur, Chuhvel khua atanga Pickup-a rawn kalte nen inhmuin Kolalian khua an pan ho ta a ni.
Kolalian khaw pelh Assam ram dep, Mizoram PWD kawng (ZHKD) Blacktop chinah hnamdang vaite hian lo nghakin, an inbe ta a. Bawng neitu nia insawite chuan bawng a kal ṭhat duh loh avangin puih an ngaih thu an sawi a, bawng awmna nia an sawi lam pan chuan an inzui ho ta a.
Km 1 vel an kal hnuah Vai dang lo langin anmahni chu light hmanga enin silaiin an tin zui ta mai niin pickup driver chuan a sawi.
Pickup driver M.K. Muanthanga S/o Rinmawia Chuhvel chu a luah thingin an vua a, a dar hnunglamah Chemin an hem bawk a. Bawng leitum Duhawma chu Vai ho hian pawisa an dil a, an insual buai ta deuh a. A hnung bera kal Fakawma chuan a ṭhiante chu a rawn pui nghal a, vai ho chuan a dulah silaiin an kap ta a, hliam tuar chunga a tlanchhiat hnuah ramhnuaiah a hliam tuar lovin a boral zui ta a ni.
Duhawma hi a nakah leh a khelah chemtein an vit a, a hliam a na ang reng hle a, Kawrthah Hospitala enfiah a nih hnuah hmunpui lamah enkawl tura refer a ni.
An intihbuaina hmun hi Kolalian atanga km 3 bawr vel a ni a, misualte chuan Duhawma pawisa ken 1,50,000 atangin cheng nuaih khat chu an la a, cheng singnga erawh motor-ah an dah avangin misualte hian an la tel lo hlauh niin an sawi. Misualte hian mobile phone pahnih leh driving licence an laksak bawk niin thudawnna chuan a sawi bawk.
THIL THLENG HRE TU DANG REPORT
He thil hi tukin zing lam dar 3:45 vel khan kan camp-ah zualko a rawn tlan a. Duty lai hnenah harsatna an khuaah a thlen thu a rawn report-a. zing varṭianah patrolling party chhuak nghalin a hmun kan va thlenga. A thi ber hian a ṭhiante a rawn phone danin, "ka ril a chhuak pûr tawh, ka tlan chhia" a tih avangin amah hi kan zawng ta a. Kawng thlang lam, kuhva hmunah a mobile phone hmuh a ni a. A bulah thisen tam tham tak a baw bawk. A mobile phone awmna aṭanga meter 20 vela hlaah a ruang hi hmuh zui nghal a ni.
Bawng lei tura va kalte hi mi pali(4) an ni a. Pakhat a hmunah a boral a, pakhat silai-a kah hliam a nih avangin damdawi In panpui a ni bawk a, hliam hi a dinhmun a ṭha vak lo a nih hmel. Mi dang pahnih hi chu an tlan chhe hman niin a lang. Tum neisa-a thil ti an nih hmel.
Post a Comment
He post chungchanga i ngaihdan lo sawi ve rawh: