AMITY CHRISTIAN FELLOWSHIP

- K Remruatfela

Vawiin Pathian biak inkhâwma thuhriltu, Upper Republic Presbyterian Kohhran Upa,  Upa H. Thangmawizuala`n Kohhran ropuina a sermon paha ram thima a rawng lo bawl tawhna chanchin tlêm a rawn târlan kha a ropui ka tiin a ngaihnawm ka ti tak zet a. Vawiin hi NEICC puala tawngtai rual hun a lo ni kher kher bawk nen thuhriltu thuchah sawi kha a saptawng takin a ‘relevant’ ka ti tak zet a ni. Thuhriltuin hnam hrang hrangte rawngbawlna kalphung in an loh dan thuchah ngaihnawm tak a sawi lai khan he thu hi ka rilruah a lo lang thar ve nghal a.

Pathian khawngaihna zara Amity University, Gurgaon-a zirna sâng zawk ûm tura ka insuan luh khan university hnuaia zirlai zingah kristian sakhaw bia 200 chuang lai awm mah ila, a huhova Pathian biak ho na hun leh hmun kha a lo la awm ngai reng reng lova. A tawi zawngin sawi ta mai ila, chutiang ringawt chu a tha dawn lo ve tiin *‘Amity Christian Fellowship’* chu din a ni ta a. Hruaitu kan han inthlan fel chuan mak tak maiin Chairman/Convener hmasa ber atan min thlang ta mauh mai a. Chutianga hnam hrang hrang leh kohhran hrang hrang infinkhâwm kan nih avang chuan kan inkhâwm dan kalhmangah inanglo leh nuihzatthlak fe fe a tam thin khawp mai. Chu chuan rawngbawlna kalkawng a tih bahlah thin châng pawh a awm leh zeuh thin.

Mizo Kristian inkhâwmah chuan Chairman kan han ding a, tantu kan han sâwm a, Secretray kan han ko leh a, kan zâi ho va, thu sawiin a chhunzawm thin a ni ngai a. Keini inkhawm ve zet zawng a dan a dang ngei mai! Chairman ka han ding chiah chu kan thian mi dumho an lo ding ve nghal suau a, ka hrilhhai angreng hle. Thil awmzia ka han zawh chuan an tih dan phung thin a lo ni awm a. Kei lahin Chairman ka ni ta lo zawk emaw ka inti rum rum hman a. Tin, Bible ka han chhiar, a chang mal tin ka han chhiar thla zel chu mi rawn chhang ve nghal zel a, chhiar a tibahlah angreng khawp mai a. Mahse, chutianga lo chhan ve zel chu an tih dan phung a lo ni leh zel bawk si a, hrilh a hai duh hle! Kan han zai te hi hla thuhmun sa theuh theuh si kan hla thlûk a inang lo hlawm hle a, African, South Asia, North India, South India, Central India, Europe leh North East inpawlh nawk kan ni si a, kan han zai te hi kan thlûk chen a inang lo leh thin a. Kan zai khawbaw kual vel nawk nawk a, a tawp a rual mawh thin khawp mai. Kan han tawngtaite hi kan ri nawk nawk a, a then awrawl tawp tawpin an au a, “Praise the Lord” an han ti chuah chuah a, a then an lo phun ri sep sep a. Chairman tân tak pawh kaihruai dan thiam a har thin hle a ni.

Nimahsela, a ropui ka tih ber lai chu kan ringtu pui hnam dang ten heti taka Pathian an lo au a, an lo be urhsûn thin a ni tih hriat hi a ni. Pathian biak inkhâwm leh kohhran anga kalkhâwmna hun kan ngah fâl bîk vang nge Mizo kristiante hi chuan inkhâwm te hi ‘formality’ satiah ang lekah kan ngai ta emaw tih theih turin kan awm fo thin a. Amaherawhchu, thlarau lama thûk lo zawk ni-a kan lo ngaih fo thin kan ringtu pui, hnam dang unaute erawh hi chuan sakhuana hi an lo la thu tak em em a. Ram thim rawngbawlna kawngah te, in serh leh in vawn thianghlimna kawngah te leh ringtu nun hona kawng hrim hrimah te pawh hian an ti ve mai mai lova, an thinlung chhungril tak tak atang Pathian an au a ni a tih loh theih loh! Mizo kristiante pawh hian an nunah zir tur kan ngah hle.

Pathian Kohhran ropuina em em chu hnam hrang hrang leh kohhran denomination hrang hrang, kal dan phung leh zeizia inang lo tak takte, kohhran inrelbawlna chhunga thiam thil leh theihna inanglo tak tak kalkhâwm leh infinkhâwmte hian Kohhran lu ber, Isua Krista kan neih tlatna hi a ni. Taksa peng hrang hrangin taksa puitling a siam thin ang hian chîn dan leh kalphung inang lo tak tak, rinna avanga kalkhâwmte hian Kohhran - Pathian khawpui kan lo din reng a lo ni a. Chuvangin, kawng hrang hranga kan rawngbawlhona te hi han lâk vawnga, han dah hniam deuh bik tur hi a lo awm reng reng lo! Chuvangin, kan theihna zâwn theuha kan rawngbawlnate hi i in zahsak tawn thar lehzual theuh ang u. _‘Aw hnam zawng zawng leh chi tin tawng tin hi, Van lal nau ang a tahna kalvari-ah, An dang chuang lo ve!”_