Tuichang lei-ah hnahthial tlangval zuangthla; a ruang zawng mek!

Aizawl | September 26, 2021: Vawiin chhun lai vel khan Tv. Rothangliana Hnahthial Venglai chu Hnahthial-Thingsai Road a Tuichang Lei aṭangin tuiah a zuangthla a, a ruang hi zawn mek a ni.


Mit a hmutute sawi danin a zuangthla hi vawikhat a rawn lâng a, tuiin a len nghal a, a taksa awmdan aṭangin a thi nghal nia an rin thu an sawi a. Hetia a rawn lâng hi a pil lehnghal a, tun thlengin hmuh ala ni lo. 

Chanchin hriat anih veleh Hnahthial Venglai Branch YMA te Tuichang luiah kal thla nghalin ruang zawn hna thawh nghal a ni a. Chanmari, Lungleng leh Model Branch YMA te'n tuitla zawn hna hi an pui nghal bawk a, veng dang aṭangin mimal ṭhahnem tak an thawk chhuak nghal bawk. 

A tlâkna lai aṭang hian luikamah inzam thlâk nghal a ni a, Hnahthial chawmtu Tuilakna bula Model Br. YMA ten luidung an humhalhna Bûk thlengin inzarpharh a ni. Tuichang hi tui a la tamin a la nu deuh bawk a, a rawn lâng anih loh chuan hmuh mai beisei a la ni lo a, tui a la khauh deuh avangin tui chhunga luh hleihtheih a la ni rih lo niin thudawnna hian a sawi. 

Tv Rothangliana hi tunhma lamah pawh rilru lamah harsatna a lo nei tawh ṭhin a, amah hi Hnahthial Post Office ah Dak Runner hnathawk lai a ni a, an lawina Kohhran Seventh Day Adventist ah pawh mi ṭangkai tak a ni. Tuichang Lei hi Hnahthial aṭangin KM 10 a hla a ni.

Post a Comment

0 Comments