Lawngtlai | Mimkut thla 7, 2021: Ṭhalai Kristian Pawl (ṬKP), Electric Veng Unit, Lawngtlai chuan an kum 35 tlinna pual leh Lawngtlai Area Ṭhalai Kristian Pawl Coordination Committee (LAṬKP)-in kum 2021 chhunga Lawngtlai Area chhunga ṬKP-te'n a thlawna thisen pek runpui an inbuatsaih chhawk dan tur calendar a siama thisen an pek thla a nih angin vawiin khan BCM Electric Veng Kohhran Hall-ah thisen an pe a. Thisen hi District Blood Bank, Lawngtlaia thawktute'n a hmunah kal chilhin, an laksak a ni.
Thisen pek ṭan hmaa Unit din champha phak puala hun hmanah ṬKP Electric Veng Unit, Lawngtlai President Pu Teddy Lalrinliana Aineh chu Pathian hnenah lawm thu sawiin a ṭawngṭai a. LAṬKP Chairman Rbt. Elvis Lalthangzuala'n thu tawi sawiin, LAṬKP Secretary Pu H. Lalmuanpuia'n report a pe a. Lawngtlai AVBD hruaitute pawhin hun hi an hmanpui bawk a ni.
Vawiina an Unit din champha phak pual leh LAṬKP calendar anga thisen pek runpui an buatsaihah hian TKP Electric Veng Unit, Lawngtlai chuan thisen unit 16 an pe a. Thisen petute hi mipa 13 leh hmeichhia 3 an ni.
ṬKP Electric Veng Unit, Lawngtlai hi kum 1986 September ni 7 khan din a ni a. Tunah hian member 287 an awm mek a ni.
LAṬKP calendar ang hian kumin 2021 chhungin Unit ṬKP 13 leh Bial ṬKP 1-in thisen hi an pe tawh a. A zavaiin thisen unit 222 pek tawh a ni.
Post a Comment
He post chungchanga i ngaihdan lo sawi ve rawh: