Hrileng avanga UPSC (CSE) exam hun leh interview hun pawhsei reng a nih hnuah 2020, UPSC result chu 24th September 2021 (Zirtawpni) khan UPSC chuan final result a ti chhuak a. An zinga pakhatna dinhmun hauhtu chu middle class tlangval Shubham Kumar, Bihar niin, exam vawi thum a hmachhawnna chiah a ni.
UPSC lamin 2020 final result an ti chhuak a, kan ngaihven ber chu Mizoram atangin tling kan awm tawh ang em tih hi a ni. Nimahsela, interview hmachhawn thei pawh kan awm loh avangin final result ah chuan Mizoram atanga tling beisei chi niin a lang lo. Kum 2020 bikah hian 10,40,060 in form an thehlut a, an zinga 4,82,770 in exam an hmachhawn thung a. Heng zinga 10,564 te chu MAIN exam hmachhawn tura thlanchhuah an ni. Chuta tang chuan interview hmachhawn turin 2053 thlanchhuah leh an ni a. MAIN thleng hian Mizoram atangin kan la lang ve rih a, mahse, kan vanduai leh ta rih a ni.
Tuna kan sawi tum ber erawh kumina pakhatna dinhmun hauhtu Shubham Kumar chanchin a ni. Kum 24 chauha upa Shubham Kumar hi Devanad Singh leh Punam Devi te fapa niin Kumhari khua Bihar atangin a lo piang a. Zirna lamah an khua atanga bultanin Parora lamah High School a chhunzawm leh a, Higher erawh Chinmaya Vidyalaya Bokaro, Jharkhand lamah a zo thung.
An chhungkua hi hausa tak an ni hran lo a, middle class chhungkua niin, a pa pawh Uttar Bihar Gramin Bank a thawktu pakhat ve mai a ni a, zirna tha leh changkang zawkah pawh zir thei lovin sawrkar sikul atanga bultan a ni. Mahse, a tumruhna leh thawhrimna avangin kum 2014 khan IIT exam clear in 219th rank a hmu a, IIT Bombay a zir theihna hun tha changin kum 2014-18 chhung khan B.Tech chu tluang takin a zir chhuak thei ta a ni.
Shubham Kumar hian naupanlai atangin IAS nih a lo tum tlat tawh thin a. A zir chhuah hnu 2018 khan a vawikhatnan UPSC exam a hmachhawn ve a, hlawhtlinna erawh a chang zo bik lo. Tichuan, 2019 khan hmachhawn lehin 290th Rank a sual chhuak a, Indian Defence Accounts Service (IDAS) pek a ni. A naupanlai atanga a lo suangtuah thin chu IAS a nih miau avangin kum 2020 khan UPSC exam hmachhawn tha lehin pakhatna dinhmun hial a thleng thei ta a ni.
A thawhrimna leh taihmakna a fakawm a, beidawng lova a beih hram hram na te hi entawn tur a ni.
Mi taima te bawk hi an hlawhtling leh mai thin a nih hi maw.
Post a Comment
He post chungchanga i ngaihdan lo sawi ve rawh: