Aizawl, September ni 27, 2021 : Vawiin khan Pu Lalhmingliana MCS, Sub Divisional Officer (Civil), Tipa leh Pu J. Vanlalramengzauva, APO, RD Department te chuan Siaha District Myunmar ramri depa awm khua Mawhrei leh Chapi a zirlai te Online Class kal dan a hmunah ngei kalchilhin an enpui.
Mawhrei leh Chapi khuaah hian Airtel Tower awm mahse 2G Network chiah a awm avangin zirlai ten harsatna nasa tak an tawk mek a ni. Tin, Online Class kal turin khawchhung atanga hla tak 3 kms vel lai a hla a an kal a ngai thin a, chawlhbuk hi hmun 4 ah an mahniin an rel chawp mai thin a ni.
Zirlai ten an harsatnate chu SDO (C) hnenah lo thlenin, network tha an mamawh thu leh an chawlhbuk khuhna tur Rangva an mamawh thute pawh an thlen bawk. Chapi zirlaite chuan an khuain an rin ber Myanmar Network Telenor chu tun hnaia signal an tihtawp tak avangin an khaw thenawm Mawhrei lama Online Class an kal chhunzawm a ngai phah thute sawiin, Mawhrei khuaten tlawmngaih leh duat taka lo mikhualin, Online Class kal tur hian tlang lamah an inpu chho thin a ni.
Pu Lalhmingliana, SDO(C) chuan Network tha an neih theih nan theihtawp chhuahsak a tum thu leh an chawlhbuk khuhna tur Rangva ngaituahsak a tum thute sawiin, tun dinhmuna an mamawh zual phuhruk nan Silpaulin leh pawisa fai cheng 2000/- chu a pe hlawm a ni. He hunah hian Mawhrei khawtlang hruaitu VC te bakah MSO Sub-Hqrs, Mawhrei ten an tawiawm a ni.
Post a Comment
He post chungchanga i ngaihdan lo sawi ve rawh: