K Hminga hla ka hmang tangkai

- K Remruatfela

Fur khua leh ruah tui chu kawp tura duan,

Pangpar leh khuaite pawh kawp tura duan;

Vanzawl a chhûm leh ni zung pawh kawp tur a duan,

Nang leh kei erawh hrang tura duan

Vawiin chu nupa inrem thei hlawl tawh lo ni-a inhriate hi Chamber-ah an rawn lêng lût hlawl a, an hmel en pawhin rilru chhungrilah lungngaihna leh hlim lohna rûk an nei a ni tih hai rual a ni lo. A mipa zâwk chuan kan nu nen hian kum 7 kan innei tawh a, fa erawh kan la nei lova, kan inngaihzâwn laia kan inmil dun tehlul nen kan inneih a chinah hian kan inrem thei tawh thlâwt lova, hlim dun kan tum viau pawhin inhauhin a chhunzawm leh vat thin a, keini pahnih inkawp hi a rem hlawl lo a niang  e tiin nakina kan hmalam hun atana tha zâwk tur ve ve ni-a ngaiin kan pahnih remtih dun na-in *Divorce Certificate* lo lâk a, bungraw insemfel law law hi kan duh ta mai a ni...a rawn ti chuai raih a.

An pa thusawi lai chuan an nu mitmeng ka en reng a. An nu pawh chuan an pa thusawi chu pawm lo chungin dik a ti hle tih pawh a hriat. Chutah, kei chuan...chil ka han lem kâk a, thudang sawi lo chuan room kawngkhar ka khar nghal a, ka phone ka la vat a, Youtube ka hmet hawng nghal bawk a. Amah K. Hminga ngeiin, _"Fur khua leh ruah tui chu kawp tura duan, Pangpar leh khuaite pawh kawp tura duan; Vanzawl a chhûm leh ni zung pawh kawp tur a duan, Nang leh kei erawh hrang tura duan."_, a han tih vawng vawng lâi châng chu ka han hmet chhuak a, thâwm dang pawlhtu awm miah lovin chu hringnun diary chu kan ngaithla ho ta a...

A hla thuah kan chêng tlâng bawk a ni ang, kan ngaihthlâk chhûng zawng chuan thâwm zawng zawng a reh vek hi hian a hriat. Chumi te nupa ka han melh zeuh chu zak ru tak chung si hian an mittui a lo tla dun fep fep a, _"Aw hringnun hian, kawp rem tura tuah rem a nei ang hian, kawp rem lo tura duan sa an awm a nih dawn hi"_ ti lâi châng a han sak thlen phei kha chuan an insum zo tawh lo, a puak chhuak ta a ni ber,  lungchim takin an inkuah heuh heuh ta zâwk a, zah leh inmillohna lam reng reng a leng tawh lo! Ka sawi thiam dân ber chuan hmangaihna luipui an tih mai, mississipi luipuiah an tleirawl inngaihzâwn lâi nunah lêtin an pil dun ta a ni ber...Inthen lam reng reng a lang thei ta lova, keipawhin inthen tir ka tum hek lo! Hringnun diary kan ngaihthlâka chinah chuan hmuh theih khawp hian an hmel a lo êng chhuak dun ta nghal a, inthlahlel tawn dun em em chungin chhungkaw nun bul tan thar leh turin an in zuichhuak leh ta hna hna zâwk a ...