COVID-19 | SERCHHIP BAZAR BUILDING LEH A CHHEHVEL RESTRICTED AREA AH PUANG

Aizawl | September 2, 2021:  Serchhip Dbawrhsap Pu Lalmuansanga Ralte, MCS, chuan nimin khan Serchhip Bazar Building bul hnaia chengte zingah COVID-19 hri kai hmuhchhuah a nih avang leh hri leng darh zel tur venna atan Bazar Building leh a chhehvelte chu hetiang hian HMUN KHUAHKHIRH BIK (Restricted Area) ah a puang.

Mizoram Sawrkar Disaster Management and Rehabilitation Department Order No.B.13021/101/2020-DMR/Vol-V dt 20.08.2021 Clause C.8 in Deputy Commissioner-te thuneihna a pek angin heng hmunte hi hrikai darh zel theihna a nih avangin Contact tracing mumal leh chak taka kalpui tur a ni ang a, a hnuaia schedule tarlante hi Ni 01.09.2021 tlai dar 05:00 atanga thu leh awm hma chu HMUN KHUAHKHIRH BIK (Restricted Area)-ah puang in; He Restricted Area-ah te hian a hnuaia tarlan ang hian khuahkhirhna khawng taka kalpui tur a ni ang.

1. Restricted area chhunga cheng zawng zawngte chu mahni inah inkharkhip vek tura hriattir kan ni.

2. Restricted area huamchhunga dawr neite hawn phal a ni lo.

3. Rikrum leh hmanhmawhthlak thil tulah chuan VLTF remtihna leh Sawrkar dan siamsa zawm tur a ni.

4. Executive Magistrate, Health Department, Police leh Fire & Emergency Services, Public Health Engineering Department, Power & Electricity Department, Excise & Narcotics Department-te a hnathawk, Restricted Area-a duty neite leh Deputy Commissioner, Serchhip emaw Sub-Divisional Officer (Sadar), Serchhip emaw in a bika phalna a pekte erawh chu he khuahkhirhna hian a huam lo ang.

SCHEDULE

1. Bazar building pumpui leh a kawtkai, building hnuailam sa zawrhna huamin.

2. Beat Office atanga Bazar building lam hawi dawr zawng zawng, Pu B. Lalbiaktluanga dawr/sumo counter thleng.

3. Kawnpui North lama vantlang zun-in leh a hnuai dawr pahnih, YMA Information Office hnuai dawr thleng.

Tupawh he khuahkhirhna thupek bawhchhia apiang chu Sec. 188 IPC hmanga hrem theih an ni ang.