COVID-19 | KHAWZAWL KHAWPUI PUMPUI RESTRICTED AREA-AH PUANG

Aizawl, the 1st September, 2021: Khawzawl District chhungah Covid-19 positive hmuhchhuah belh zel a ni a. A bikin Khawzawl Town chhungah tunhnai ni 5 (nga) chhungin Covid-19 positive case 55 hmuhchhuah tawh a ni.


Hrileng darh zel tur venna atan inkhuahkhirhna khauh zawk kalpui a tul tih hriat a nih avangin Pu C.C Lalchhuangkima, Deputy Commissioner & Chairman, District Disaster Management Authority Khawzawl District chuan Section 34 (b) 34 (c) leh 34 (m) of the Disaster Management Act, 2005 tlawhchhanin, Khawzawl Town pumpui chu September ni 1, 2021 zan dar 7:00 atanga September ni 8, 2021 zan dar 7:00 thleng hmun khuahkhirh bik 'Restricted Area' ah a puang.

Restricted Area-a puan hun chhung hian Medical Team, Khawzawl District ten a tul angin Khawzawl Town chhungah mass testing an kalpui dawn a. Hrikai dinhmun uluk taka thlithlaiin Deputy Commissioner hnenah report a pe thin dawn a, report azirin inkhuahkhirhna kalpui zel dan turah ruahmanna siam thin a ni ang.

Restricted Area huam chhunga inkhuahkhirhna zawm ngei ngei tur hetiang hian duan a ni:

1. Tumahin mahni in/compound an chhuahsan tur a ni lova, lirthei hmanga veivah pawh khap a ni.

2. Village Level Task Force (VLTF) hnena hriattir hmasa lo leh an remtihna lovin Restricted Area-ah tumah an lutin an chhuak tur a ni lo. Hei hian state pawn leh Mizoram chhung hmun dang atanga lokalte a huam ve ve ang. Magistrate Duty, Zonal Officer, Medical duty, Security duty, VLTF leh Essential service hna thawktute chu a huam lo ang a, Restricted Area paltlang tur motor leh mihringte pawh a huam lo ang.

3. Sumdawnna hmun, Zirna in, Biakin, Bank leh Office-te chu khar tur a ni.

4. Khawzawl DC Office Order No.J.12019/17/2021-DC(KZL)/VOL-XIII dated 21.08.2021 kaltlanga Khawzawl Town chhunga zing leh tlai tawngtai phal tawh chu sut a ni.

5. Ei leh in leh nitin mamawh chungchanga harsatna nei an awm loh nan VLTF ten uluk takin an veng chhung an vil ang a, a tul angin ruahmanna an siam thin ang.

6. Mahni compound chhungah bak hnathawh phal a ni lo. Hna thawk turin midang rawih phal a ni lo a, bungrua pawh a awmsa hman tur a ni. Chhiatrupna thlen theihnaah chuan bialtu Zonal Officer/Incident Commander hriatpuinain thawh theih a ni ang.

7. Mimal tinin Covid-19 Appropriate Behaviour (CAB) uluk taka zawm tur a ni.

8. VLTF ten harsatna leh mamawh an neih chuan bialtu Incident Commander hnenah an thlen ang.

Restricted Area Order in a huam loh turte:
1. Damdawi lama thawkte
2. Print & Electronic Media (Thuthar thehdarhtute)
3. Cable & Communication service
4. Tuisem leh tui chawi
5. Bawlhhlawh paih
6. P&E Department
7. PWD Department
8. Disaster kaihhnawih buaipuitute
9. Sawrkar hnathawk, an hnaa loh theih loha kal ngaite. Head of Office ten hminghmerhin Order an siamsak ang a, VLTF leh Executive Duty te an entir thin ang
10. Chhiat tawh leh medical emergency vanga chhuah ngai, VLTF hriatpuina nei
11. Bawnghnute sem
12. Exam pawimawh nei
13. Deputy Commissioner leh a aiawhten phalna an pekte

Post a Comment

0 Comments