Assembly Session ka thlir ve a!

- K. Remruatfela

1. State khat aiawha roreltu rorel dânah kan chîm chin tâwk a la hniam hle tih a lang a. Inbuatsaihna a tha tâwk lo hlawm tlangpui a, kan department enkawl theuhte kan chiang tâwk lo thin tih a lang chiang hle bawk. Speaker in House a vawng zahawm tâwk lo thin hle a, rorel a kaihruai dânah thu lâi a la tâwk lo thin em aw a tih theih bawk. Tin, house chhunga member thenkhatte tawngkam chheh duh dân ngaihthlakin ram leh hnam tan kan serious tâwk lo hle tih pawh a hriat theih a. Parliamentary proceedings & manners te pawh hi kan inzir thar leh fe a ngai hlawm tih a lang chiang tak meuh! Khua leh tuite hian, thil tak tak *Reality* hi kan beisei tawh tih kan hriat reng a tha.

2. Kan MLA zahawm tak, Pu Lalduhoma zawhna kan Power Minister chhanna kha duhthusâmin a fiah tâwk lo hle a. Kan Power Minister in sawrkar sum leh pâia indaihlohna vanga bill sâng anga ngaihkawih theih tura a sawi phei kha chu a zialo lam deuh a ni. Engvangin nge sawrkarin sum a neih loh, engtinnge tangkai zawka kan sum neih chhunte kan hman theih ang tih tâk a ruanga power tariff tih sân zawnga solution zawn kha chu economic stability neihna a ni lo reng reng a, consumer te phurrit siam belhna lian tak a ni a tih loh theih loh!

3.  Kan Finance Minister hnen atanga kan hriat danin sawrkar hnathawk leh sawrkar rinchhana eizawng leh sawrkara innghat kan tam lutuk hi kan ram economy chhiat chhan ber niin a lang a. Hei hi chu thudik ngei a nih a rinawm. Thalaite hian in en lêt nachâng hria ila a duhawm hle. Zirlai thluak tha zual ten State sawrkar hnuaia MCS/MPS officer nih kan la tum deuh vek tlatte hi kan tum a hniam vâng kan ti dâwn nge kan ram economy kan vei tak tak tâwk loh vâng kan ti zâwk ang? Sawrkar hnathawk lo ngam tur khawpin huaisenna i nei ang u.

4. Sawrkar sum harsat chhanah hripui lêng hi kan mawhpuh fo thin a, hei hi chhuanlam a tling tâwk lo! Financial Manager tha deuh nei chu ni ila chu central atanga fund lo kal leh mipuite khawsak phung danglamna atanga mamawh kiamna atang hian he hripui lêng hi ram economy khaichhuahna hun remchâng a ni thei zâwk! Chumi atana mi hausa, mi vântlâng leh mi retheiten ram economy buai miah lova an inpeizâwna, an inkhaichhoh theih dan turte pawh article vawi tam tak ziah niin sawrkar pawh finchhuah a ni tawh thin a. A tihhlawlhtlin erawh sawrkar mawh a ni tawh. Tun kan session ngaihthlâk tawh chin atanga reh bun chuan kan ram hmabâk hi a êng lo hlein a lang. Hawh u, i harhchhuak vat teh ang u...