Aizawl | September 23, 2021: Agriculture Minister Pu C. Lalrinsanga chuan vawiin khan Durtlang North-a Agriculture Godown hman tangkai tawh loh chu tuai thar a, Sawrkarin a ruahman mek Vegetable Supply Chain-a thlai thar phochhuah nana hman tangkai dan tur enpuiin a hmunah a tlawh.
He hunah hian Durtlang North Local Council chuan Durtlang in thlai thar zawrh leh phochhuahna hmun an neih that tawk loh thu leh Durtlang North-a Agriculture Godown hlui chu sawrkarin supply chain kalpui nana hman a duh avanga Agriculture Minister chunga an lawmthu an lo thlen a.
Minister Pu C.Lalrinsanga chuan Aizawl khawpuiin thlai thianghlim ei tur a mamawhna sang takah hian Aizawl AMC huam chhung leh pawn lama kuthnathawktute tan market a tha tawk em em a. Hei hi kuthnathawktuten hre thar leh ila; kan thar ve theih reng state dang atanga thlai kan la lut nasa lutuk hian kan economy a ti than thu mai ni lovin lak luh tam lutuk chuan kuthnathawh hi a nih dan tur angin a hlawk thei thin lo. Kan thar ve theih reng hi chu I thar ve ila, chu chuan state dang atanga thlai lo lut tur hi a dang chat mai dawn a ni a ti. Panhnah ringawt pawh kan lalut tam lutuk a, tunah hma kan han la chho a, tam tham tak chu kan thar ve thei reng a ni tih kan chiang tawh a ni a ti.
Minister chuan tunah Rabi Season kan lut chho dawn a, Vegetable market chain siam tura kan hmalakna-ah hian Durtlang hian a thawhhlawk thei hle dawn a ni a ti.
Durtlang North-a Agriculture Godown hi Square feet 1800 a zau niin, a chhawnga sak a ni a. Vegetable Supply Chain ruahmanna kal mekah he building hi tangkai lehzuala hmangin market changtlung tak din nan ruahmanna siam tum a ni.
Minister hi AMC Mayor Pu Lalrinenga Sailo leh Agriculture Department officials thenkhat ten an tawiawm a ni.
Post a Comment
He post chungchanga i ngaihdan lo sawi ve rawh: