THINLUNG THAR

 Sam 51

Vanlalthansanga

Nathana’n Davida a zilhhau

II Samuela 12: 1 – 7 ah Nathana’n Davida a zilhhau chungchang thu kan hmu a hetiangin, “Tin, Lalpa chuan Davida hnenah Nathana a tir a. Tin, a hnenah chuan a kal a, ‘Khaw pakhatah hian mi pahnih an awma; pakhat chu mi hausa a ni a, pakhat chu mirethei a ni a. Mi hausa chuan beram rual tam tak leh ran rual tam tak a nei a: mi rethei erawh kha chuan beram no a nu te tak te pakhat a lei, a vulh pakhat chauh lo chu engmah a nei lova, a hnenah a fate nena puitling anni a; a thleng zenpui leh a no tawmpui, a angchhunga awm, a fanu ang chiaha a ngaih a ni a. Tin, mi hausa hnenah chuan khualzin pakhat hi a va thleng a; tin, a hnena mikhual lo thleng chu ama beram leh ran chu talh phal lovin mi rethei beram no chu a chhuhsaka, a hnena lokal pa chu a talh a’, a ti a. Tichuan Davida chu chumi chung changah chuan a thinur ta viau mai a, ‘Nathana hnenah chuan, ‘Lalpa nunna chhalin ka sawi e, chu thil titu chu tihhlum mai tlak a nih chu; tin, hetiang thil a tih avangin beram no chu a leh liin a rulh tur a ni ang,’ a ti a. Chutichuan Nathana chuan Davida hnenah, ‘Nangmah hi i ni a lawm…….’” a ti a.

Lal Davida kha

Davida kha, ‘Pathianin ka rilru ang pu mi’, a lo tih kha a ni a, ti sual thei awmlo tak a ni. Pathian mithmuhah pawh mi rilru dik a ni a. Mahse amah Lal Davida ngeiin, “Ngai teh, khawlohnaa dinin ka awma, ka nun sualin mi paia” a lo tih angin. Mihring hian a tisual thin a, Pathian duhloh zawng a lo ti leh mai thin a ni.  Chutianga Lal Davida meuh pawh sualah a tluka, Pathian duhloh zawng anga a awm theih chuan, keini phei chu kan va tisual nasa thin dawn em!

Davida Nun atanga kan zir theihte 

Lal Davida chetsualna atanga zirtur kan neih te Sam 51-na atang hian kan zirho dawn a ni.

 A thil tihsual a pawm a, Pathian hnenah sual inpuanna a nei nghal a ni.

Chang 3-na ah khan “Ka bawhchhiatnate hi ka hre ta si a: ka sual hi ka hmaah a awm fo thin a ni”  ati a. Zawlnei Nathanan Pathian duhloh zawng a ti a ni tih a hrilh khan, insawi fiah a tum lova, Pathian chungah a tisual a ni a ti hmiah mai ni. Tunlai hunah hian kan thiltih sual leh tih dikloh te hi Pathian miten hmaichhanah min hrilh se, kan duh lovin, kan lungawi lo hle ang a, kan sualnate min hrilhtu chu kan haw let hlauh hial mai thei a ni. Lal Davida anga, mahni tihsual pawm ngam ringtu kan awm hi a hun ta hle a ni. 

Inchhirna, simduhna thinlung a nei

Chang 4-naah khan, “I chungah, i chung chauvah thil ka ti suala, I mit hmuhah thilsual chu ka lo ti ta a…”tih kan hmu a. Helai chang atang ringawt pawh hian Pathian chungah a thil tihsual chu a pawma, tichuan inchhira sim duhna tak tak thinlung pu a a tawngtaina kha chang 6-na ah khan kan hmu chhunzawm nghal a ni. “Husop-in mi tifai la, tichuan ka fai ang, mi silfai la, tichuan vur aiin ka var ang.” Tunlai mite anga, vawiina sima, naktuka thil sual tih leh nghal duhna thinlung chu Lal Davida hian a pu lo hle mai. Tunlai kan boruak han thlir hian mi thenkhat chu, inchhira simin an hun an hmang emaw kan tih lai te hian, nundan hluiah bawk kan kir leh thin a, Lal Davida anga, inchhira sim duhna tak tak thinlung kan neih a tul tawh hle a ni. 

Pathian hnenah ngaihdam a dil

Chang 1 – 2-na ah Lal Davida ngaihdam dilna kan hmu a, “Aw Pathian i ngilneih em avangin mi khawngaih la; I lainatna nasat avangin ka bawhchhiatnate hi thai bo vang che. Ka khawlohnate hi mi silfai sak var la, ka sual hi mi tlenfaisak ang che.” Chutiang zelin chang 1-na ah pawh “I hnen ata hi mi paihbo suhla; I thlarau thianghlim hi mi laksak suh ang che.” Tiin ngen ngawl takin Pathian hnenah a sualnate avangin ngaihdam a dil a ni. Pathian hnen chu sawi loh mihring hnena ngaihdam dil leh inphahhniam hi tunlai rawngbawltute hian kan harsat hle niin a lang a ni. Nimahsela Lal Davida chuan i he lovin, mahni inbun ruak vek khawpa inphah hniamin, thuhnuairawlh takin Pathian hnenah ngaihdam a dil a ni.

Thinlung thar leh thianghlim tak a dil

Chang 11-na ah khan, “Aw Pathian, keimahah hian thinlung thianghlim tak siam la; ka kawchhungah hian thlarau dik tak siam thar leh ang che.” Tih kan hmu a, helaia ‘siam’ tih tawngkam kan hmuh hi, Genesis 1:1-a Pathianin lei leh van a ‘siam’a tih nen hian tawngkam thuhmun a ni a, chuti a nih si chuan Lal Davida hian Pathian hnen atanga chhuak thinlung thianghlim leh dik tak neih leh duhna tak tak thinlung a nei a ni tih kan hrethei a ni. A khawlohna leh a sualnate avangin Lal Davida hian thinlung thianghlim tak leh diktak neih leh chu a duh ngawih ngawih a ni tih a hriat a ni. Tunlaia Pathian rawngbawltu te pawh hian thil kan tisualin Pathian duhloh zawng te pawh kan ti ve leh mai zel, nimahsela Davida anga, thinlung thianghlim taka rawngbawl thei hi kan awm em le? Thinlung thianghlim taka rawng kan bawl thei lo anih chuan kan rawngbawlnate chu a ngaihtuahawm hle ang a, rawngbawlna nung leh Pathian lawmtlak kan nei thei lovang tih a hlauhawm hle a ni.    

Thlarau thar neih a dil

Lal Davida khan a nun a chhui kira, hun liam tawh te a ngaihtuah khan hlim takin, nuam takin Pathian thlarau duhzawnga nungin a hun te hmangin, Pathianah hlimna leh lawmna te kha a neia, hahdam takin, a hun kha ahmang thin a ni. Nimahsela chu a sualna leh Pathian duhloh zawng a tihna te avang chuan Pathian thlarau chuan a kalsan a, Pathian a a hlimna leh a lawmna te chu a lo bo zo ta  a ni. Chung te avang tak chuan chang 12-naah khan he thu hi kan hmu a ni, “I mi chhandam hlimna chu mi pe leh la: thlarau tihnuamin mi chelh reng ang che.” Pathiana a ta bo hi a awl em em a, Pathian thlarau chhuahsan nih te hi a hlauhawm em em a ni, a chhan chu Pathian thlarau chuan hlimna leh lawmna te lungawina te a keng tel thin. Pathian thlarau tellova rawng kan bawl chuan, kan rawngawlna te hi a nung thei lova, hlimna tak tak kan nei thinlo a, chhungrilah buaina leh harsatna a rukin kan nei tho tho a ni. Chumi avang tak chuan, Davida ang hian thlarau thara rawng kan bawl theihnan siamthar kan ngaia, Pathian atanga chhuak hlimna leh lawmna kan neih a tul hle a ni.