Sports minister-in Lungleiah khelmual hrang hrang lungphum a phum

Lunglei | August 17, 2021: Vawiin khan Mizoram sawrkara Sports & Youth Services Minister Pu Robert Romawia Royte chuan Lunglei Salem Vengah Mizoram chhim lama Standard Hockey Field hmasa ber tur ‘Leitlangpui Hockey Ground’ bul tanna lungphum a phum a. Ramthar Veng-a Futsal Ground tur leh Lunglei Electric Venga football field awm sa tih changtlunna tur leh Astro Turf Football Ground atana phullem phahna tur lungphum a phum bawk.


Heng sports hmasawnna ruhrel hmalaknate te hi sawrkar laipui Ministry of Minority Affairs hnuaia Pradhan Mantri Jan Vikas Karyakram (PMJVK) Scheme kaltlanga niin, project cost belhkhawm hi a vaiin Rs. 2241.46 (Cheng nuai sang hnih za hnih sawmli pakhat chuang) a ni. Project hrang hrang atan first installment pawh Mizoram Sawrkar kutah rawn release tawh a ni, a ti.

Sports Minister Pu Robert Romawia Royte chuan Mizorama sports discipline hrang hrang leh sports infrastructure tih hmasawn zel kawngah Sports and Youth Services Department chuan theihtawp chhuak mek zelin Sawrkar laipui kaltlanga ruahmanna lian tham tak tak thawh chhoh anih tur thu a sawi a. Lunglei District-ah pawh ruahmanna hrang hrang kalpui tum niin heng sports infrastruture ruahman tur te hi Lunglei District thalaite mamawh chhanna a nih a, tangkai taka an hman a beisei thu a sawi. Sports lama inkaihhruaina mumal tak Mizoramin a neih Sports Policy 2019 kaltlangin infiamna discipline hrang hrang tih hmasawn tum a nih thu leh Mizoram thalai tam zawk ten Sports hmanga eizawnna an neih theihna tura hmalak zel anih tur thu Sports Minister hian a sawi a ni.

Lunglei East bialtu MLA leh HPC Vice Chairman ni bawk Pu Lawmawma Tochhawng chuan Mizoram sawrkarin sports leh a kaihhnawiha Lunglei District tih changtlunna tur ruahmanna a siam chu lawmawm a tih thu sawiin, District mipuite chu neitu thinlung pu-a hna thawktute pawh tha taka lo thawhpui turin a chah a ni.

Lunglei South bialtu MLA leh Bamboo Development Board Vice Chairman Dr K.Pachhunga pawhin thu sawiin Lunglei mipuite mamawh sports infrastructure project lian tham tak tak ruahman mek a ni chu lawmawm a tih thu sawiin hlawhtling tura infiammi chherchhuahna hmanraw tangkai tak an la nih ngei a rin thu a sawi a ni.

Technical Report petu, Sports & Youth Services Director Pu Lalsangliana chuan Lunglei Salem Venga ‘Leitlangpui Hockey Field’ buatsaih tur chu cheng nuai 1108.70 senga PMJVK Scheme atanga sak tur a nih thu sawiin 1st installment cheng nuai 498.92 dawn tawh a ni, a ti a. Ramthar Veng-a Futsal Ground tur chu PMJVK atangin cheng nuai 319.78 sanction niin 1st instalment cheng nuai 143.90 dawn tawh a ni. Electric Veng Football Field tih changtlunna tur leh phullem phahna tur atan hian PMJVK atang thovin cheng nuai 812.98 sanction a ni a, 1st installment cheng nuai 365.84 dawn tawh a ni bawk.

Tukin zingkar khan Sports Minister hian Mizoram State Sports Academy Lunglei Zobawk a cheng Nuai 3430.98 sen na tur sak lai mek te a hmun a kal in a tlawh a, Sports Minister chuan Covid hripui leng karah Sawrkar phalna la a Contractor ten hna chak tak a an kalpui thei chu lawmawm a tih thu sawiin hmanrua tha chauh hmang a Building sak leh hnathawh dang te a hun a zo hman tur in Engineer te leh Contractor te a chah a ni.

Tukin zingkar vek khan Minister chuan Lunglei Civil Hospital a Oxygen PSA Plant lian 1000 LPM bun na tur sak mek leh Lunglei Civil Hospital Laboratory sak mek te a tlawh bawk a, Covid Test Centre pahnih te pawh tlawh in Doctor te leh Volunteer te in pêk na fakawm a tih thu a sawi a, thei rah ei tur te pe in Covid Volunteer te tan pawisa fai cheng Sînghnih a hlan bawk.

Pu Robert Romawia Royte hi Lunglei HPC Vice Chairman, Pu Lawmawma Tochhawng, Bamboo Development Board Vice Chairman, Dr. K. Pachhunga, Pu Kulothungan A., Deputy Commissioner Lunglei, Pu Lalsangliana, Director, Sports & Youth Services Department, Pu Saitluanga, Jt. Director, Tourism Department, Pu David Zohmangaiha, Councillor, Aizawl Municipal Corporation, official leh party miten an tawiawm a ni.

- DIPR

Post a Comment

He post chungchanga i ngaihdan lo sawi ve rawh:

Previous Post Next Post