RAMRI | Mizoram leh Assam-in inremna hrang hrang ziak

Aizawl | August 5, 2021: Mizoram sawrkar leh Assam sawrkar aiawh te chuan vawiin khan meeting neiin ramri buaina kal mekah inremna hrang hrang an siam.

Tun hnaia Assam leh Mizoram ramria buaina chinfelna tur Thuchhuah Intawm (Joint Statement) chu State pahnih aiawhten vawiin khan Aijal Club, Aizawl-ah an ziak a. Mizoram aiawhin Home Minister Pu Lalchamliana leh Home Secretary Pu Vanlalngaihsaka ten hming an ziak a, Assam aiawhin Border Protection & Development Minister Pu Atul Bora leh Border Protection & Development Secretary Pu GD Tripathi ten hming an ziak bawk a ni.

THUCHHUAH INTAWM

1. Ministry of Home Affairs, Government of India, Mizoram Chief Minister leh Assam Chief Minister ten ramri buaina chin fel a nih theihna tura hma an lak mek chu Mizoram Sawrkar leh Assam sawrkar chuan tha a ti a. State pahnihte chuan Ramri hrula boruak ralmuang a awm thuai tha tiin ramri chungchangah inremna tluantling a awm theih nan thu inchuh laite chu dawhkan kila sawiho nise an ti a ni.

2. Mizoram Sawrkar aiawhte chuan July ni 26, 2021 thil thlengah nunna chan an awm chu pawi an ti hle, he thil thlenga hliamtuarte pawh an dam that thuaina turin duhsakna an hlan bawk a ni.

3. State pahnihte chuan ramri hrulah remna leh muanna a awm theih nan hmalak an rem ti a. Remna leh muanna a awm theihna tura Central Sawrkarin vengtu sipai an rawn dahlut tur pawh rem an ti ve ve a ni. Boruak tha tak a awm theih nan tunhnaia State pahnihte an in tihbuaina hmunahte State pahnihte chuan State Police te leh Forest lam hnathawktute chu dahbelh emaw, patrolling ti tur emaw, helai hmuna inbengbel tur emaw, hma la tura intirhluh loh an rem ti ve ve a. He inremsiamna hian Mizoram leh Assam ten ramri an intawmna hmun – Karimganj District, Hailakandi District, Cachar District, Mamit District leh Kolasib District-a ramri hrulte a huam a ni.

4. Mizoram leh Assam sawrkar aiawhte chuan an state pahnih huam chhung, a bik takin ramri hrulah remna leh muanna a awm theihna tura hmalak leh theihtawp chhuah an rem ti tlang bawk a ni.