NEC Secretary hovin NEC hnuaia project hrang hrang kalpui mek thlirho

Aizawl | August 27, 2021: Mizoram chhunga hmasawnna kawng hrang hrang North Eastern Council (NEC) sum hmanga thawh mek project 26 te chu vawiin khan Chief Secretary Pu Lalnunmawia Chuaungo leh NEC Secretary Pu Moses Chalai hovin Aijal Club-ah uluk taka thlir ho a ni a. Khaihlak awm lova zawh vat a nih theih nan hmalak ni se an ti a ni.


Pu Lalnunmawia Chuaungo chuan NEC Secretary Pu Moses Chalai hova Mizoram chhung ngeia NEC Review Meeting neih theih a ni chu a lawmawm tak zet tiin a tel zawng zawng te he hun hmang tangkai tur hian a fuih a. Project an thawh mek te chak leh awmze nei zawka an kalpui theihna turin harsatna an tawh te, kalphung tha zawk nia an hriat te, tul leh pawimawh an tih apiang zalen taka sawi turin a chah a. NEC hian hmarchhak state hrang hrangah nasa takin hmasawnna hna a thawk a, Mizoram pawh NEC hmalakna chhawr tangkai ber te zingah a tel a ni, a ti.

Pu Moses Chalai chuan hmarchhak state te chu ASEAN ram te nena inhnaih taka awm an nih avangin insumdawn tawnna kawngah an hmabak a eng hle, a ti a. Heng ram atanga lakluh (import) lam hawi ringawt ni lovin, thawnchhuah (export) kan nei ve tur a ni tiin hmarchhak state a cheng te tan la turin a fuih. Mizoram chu NEC sum atanga project kalpuite an thawk tha thawkhat nia a hmuh thu a sawi a. A hun takah sum an dawn theihna turin NEC pisapuia thehluh tur tul ang zawng zawng a hun taka thehlut thin turin a chah a ni.

Vawiin meeting-ah hian Planning Secretary Pu Lalmalsawma chuan Mizoramin NEC fund atanga hna a thawh mek sawifiahna hun a hmang a. Tun dinhmunah project thawh mek 26 awmin chung zinga 15 te chu kumin sawrkar kum chhung hian thawh zawh hman beisei a ni.

Post a Comment

0 Comments