MSSC thukhawm in Sports huanga hmasawn dan tur sawiho; Lalremsiami lawmna leh chawimawina hun hmang dawn


Aizawl | August 23, 2021: Ni 18.08.2021 (Wednesday) 3:00 P.M khan RB. McCabe Hall, Aijal Club-ah Covid19 hrileng dona kawnga sawrkarin inkaihhruaina a siam te tha taka zawmnchungin Mizoram State Sports Council General Body Meeting neih a ni.




He General Body Meeting hi Mizoram State Sports Council President leh Minister of State (I.C.), SYS, ICT leh Tourism, Pu Robert Romawia Royte-in a kaihruai a, sports tih hmasawnna tur thu pawimawh tak tak rel a ni.



Pu Robert Romawia Royte, President, MSSC chuan he hunah hian MSSC Annual Report 2020-2021 chu a tlangzarh a. MSSC President chuan MSSC Member, Association hruaitute chu Central atanga sum haichhuak thei tur khawpa tan la turin a fuih a, target mumal tak neia hma an lak thiam chuan central lam pawh an in hawn thu a sawi a. Minister hian MSSC hnuaia project te tunhnaiah a let 20 laia a lo pun tak thu a sawi bawk a ni.

He hunah hian MSSC Act - 2002, Chapter - VI; Section - 19 in a phut angin MSSC Annual Programme 2021-2022 chu pharh a ni a, kum 2021-2022 budget (B.E) atan Rs. 1095.03 lakh chu lungrual taka pawm a ni.


Meeting chuan 23rd July - 8th August, 2021 chhunga neih Summer Olympics, Tokyo, 2020-a India ram aiawha hmeichhe Hockey Team-a tel, NI. Lalremsiami chu chhuanawm a ti a, amah lawmna leh chawimawina programme ropui taka buatsaih nise tiin a rel a. Celebration Committee an din nghal a ni. Chairman, Pu Robert Romawia Royte chuan NI. Lalremsiami, Olympian chu Chief Minister-in a lo sawi tawh angin Mizoram Sawrkar-in sawrkar hna tha tak a pe dawn a ni tih memberte a hriattir bawk a ni.

India aiawha hmeichhe hockey player Lalremsiami chu August 25, 2021 khian Lengpui Airport-ah a lo tum dawn a. Amah lawmna leh chawimawina neih dan turte Mizoram State Sports Council General Body meeting chuan MSSC Vice-President Pu V. Vanlalzawma, Chairman-na hnuaiah Committee a siam nghal a ni.


Minister Pu Robert Romawia chuan tunah Mizoram sawrkara Sports Department chuan cheng nuai sing 2 velin hma a la mek a; Sports tihchangtlun nan state sum ringawt hmang lovin 'Khelo India' leh thildang atangin sum hmuh a ni a ti. Pu Robert Romawia chuan Olympic atan hmathlir tha tak neih a tul a, chumi tihlawhtling tur chuan India sorkar a inhawng em em a ni tiin Mizoram pawh Sports Industry a nei ta hi a vanneihthlak hle a ni a ti bawk.


MSSC General Body meeting hian Annual Programme 2021-2022 leh Annual Report 2020-2021 te sawihovin an pawm a ni.

- DIPR

Post a Comment

0 Comments