Mizoram Women Commission-in Pi Lalsangpuii te nupa chunga thil thleng National Commission for Women hriattir

Aizawl | August 2, 2021: Mizoram State Commission for Women chuan 26/7 a Pi Lalsangpuii te nupa chunga ramria thil thleng chu a ngai thutak hle a, Assam State Commission for Women ah lehkha thawnin, National Commission for Women, Delhi a hriattir nghal bawk a ni.

Assam State Commission for Women hnenah lehkha thawn-ah chuan tun hnuah Assam Police te leh mipuiten hmeichhe chunga hleilenna an thlentir tawh loh nan a tul anga an mi leh sate an lo thunun ngei Mizoram State Commission for Women chuan a beisei thu lehkhaah chuan tarlan a ni a, Mizoram State Commission for Women chuan he thil thleng hi National Commission for Women, Delhi a hriattir nghal bawk a ni.

July Ni 26, 2021 (1:30 P.M.) khan Pu John Vanlalzawna leh a nupui Pi Lalsangpuii (28) ten Silchar atanga Mizoram an rawn panna kawngah Assam police leh mipuiin an lo sawisa a, hliam nasa tak an tuar a ni. Hemi ni hian engmah thu thang hlauh tur leh border chungchangah buaina sosang a awm tih pawh hre lovin Vairengte an rawn panin, July, 26, 2021 chawhnu hian Pu John Vanlalzawna te nupa-in an motor-a Silchar atanga Mizoram panna kawngah border disputed area-ah Assam police leh mipuiten lo tidingin an motor atangin an pawtchhuak a, an motor an tihchhiat hnuin an kaltir leh ta a ni.

Video:

Hemi hnu reiloteah hian hmun pakhatah Assam police leh mipuiin lo tiding lehin an motor atangin an hnuk chhuak a, hmeichhia pawh sawi lovin an nupa hian kut an thlak a, an motor pawh an tichhe nasa hle a ni. Pu John Vanlalzawna nikhaw hre lova an awm hnu-ah pawh a nupui Pi Lalsangpuii, hmeichhe awm nem, mahni pawh inveng thei lo tur chu Assam police leh mipui te chuan an pawt a, an hnuk a, an sawisak mai bakah anchhia te lawhin chil an chhak khum a ni.

Hetianga sawisak an nih lai hian CRPF te rawn tlazepin an nunna an chhan ta a ni. Pi Lalsangpuii hian taksa-a nasa taka hliam a tuar mai bakah rilru lamah nasa takin hliam a tuar bawk a ni. Pu John Vanlalzawna te nupa-in buaina an tawh hun lai hi Assam leh Mizoram an innawr hma kha a ni a, hetianga buaina an tawh hun hi Chawhnu Dar 1:30 vel a ni.

Hemi chungchanga Pi Lalsangpuii tawrhna hi Mizoram State Commission for Women chuan a la thu tak hle a, Assam police leh mipuite chet dan chu a dem takzet a ni. Mizoram State Commission for Women chuan Assam State Commission for Women hnenah lehkha thawnin tun hnuah Assam Police te leh mipuiten hmeichhe chunga hleilenna an thlentir tawh loh nan a tul anga an mi leh sate an lo thunun ngei Mizoram State Commission for Women chuan a beisei thu lehkhaah chuan tarlan a ni a, Mizoram State Commission for Women chuan he thil thleng hi National Commission for Women, Delhi a hriattir nghal bawk a ni.