KHAWNGAIHIN KA LAM I LO HAWI THEI ANG EM?

- Rick Warren

- 31 August, 2021



“Min zawng ang a, in thinlung zawng zawnga mi zawn hunah chuan mi hmu ang.” Jeremia 29:13.

Mi dang va ngaih pawimawhna hi thil pek hlu ber a ni, a chhan chu i hun hi i nun a nih avangin.

Mi tu emaw lama i hawia an mit taka i en phei chuan, i ngaihsak tak tak a ni tih leh an thusawi tur pawh chu i tuipui hle a ni tih i lantir a ni. 

Hetiang chiah hian – Pathian lam hawia ṭawngṭaiin Pathian hnenah pawh i ti thei a ni. Chung lam en tawp mai la! Pathian chu be turin i inpeih a ni tih lantir rawh. Thil ṭha tak a nih rualin, kan ṭawngṭai laiin kan mit kan chhing tur a ni tih leh kan kun tur a ni tih Bible-ah a awm hran lo. Ka mit ka chhina thil ka ngaihtuah chuan, ka lo muhil leh mai ṭhin.

Chung lam hawi chunga ring taka ṭawngṭai hi kei chuan a nuam ka ti a, chu chuan taksa pawhin Pathian lam ka hawi leh a ni tih min hriat thartir vang a ni.

Daniela chuan hetiang hian Pathian ṭanpuina leh finna a mamawh apiangin a ti ṭhin a ni: “Amah zawng turin ṭawngṭaina hmangin Lalpa Pathian lam chu ka hawia” (Daniela 9:3). Pathian chu a Thu hmanga i ngaihthlak hnuah, a dawta i tih tur chu ṭawngṭai hmanga amah zawn a ni. 

Bible-ah Pathianin amah zawngtute tan thutiam tam tak a nei a ni.

“Mi zawng ula, in nung ang" (Amosa 5:4). I zawn ngar ngar chuan, nun dan tak tak chu i zir ṭan ang.

“Mi hmangaihtu chu ka hmangaiha, ṭhahnemngai taka mi zawngtute chuan mi hmu ang.” (Thufingte 8:17). Pathian i zawnna lamah harsatna i tawh pawhin, zawn dan dikin Pathian zawn tum la – amah aṭanga thil dawn ringawt ngaihtuah lovin, amah chu hriat tum zawk ang che".

“Min zawng ang a, in thinlung zawng zawnga mi zawn hunah chuan mi hmu ang.” Jeremia 29:13.

Hun awl remchang satliaha zawn mai ni lo, hriat duhna tak tak nena Pathian chu i zawn hunah i hmu ang.

“Pathian chuan … tihtak zeta amah zawngtu hnenah lawmman a pe ṭhin” Hebrai 11:6. I sumdawnna, sum leh pai, inlaichinna leh hma lam huna Pathian aṭanga lawmman dawn i duh em? Amah chu zawng rawh.

“Ama ram zawng zawk rawh u; tichuan, chung thil pawh chu a pek belhchhah dawn che u nia” (Luka 12:31). Pathian i zawn hmasak chuan, khawvelin pawimawh a tih zawng zawngte pawh ngaihtuah buaia lungngaih a ngai tawh lo. Pathian lam ngaihtuah la. I hmel chu a lamah hawi la, Amah chu a hmasa berah i dah a ni tih lantir ang che. 

Han ngaihtuah la

Kum lo awm tur hi i tan kum ṭha ni turin i nuna danglam i duhna zawng zawngte pawh ngaihtuahin han ruahman chhin la, eng ang chiah nge ni ang le? 

Pathian lam en tlatna chuan engtiangin nge i suangtuahna, tum leh ruahmanna te ti hlawhtling turin ngaihtuahna dik a pek che le?

Engvangin nge Pathianin amah chu zawng turin a duh che nia i rin le? 

[Lettu: Sangpuia]

Post a Comment

0 Comments