COVID-19 | Health Minister hovin Partial lockdown kalpui mek thlirho

  • "Kan ziaawm anga kan lan lai hian kan in thlahdah palh ang tih a hlauhawm a, mimal tin kan fimkhur zual sauh sauh a tul hun lai tak a ni" - Health Minister Dr R Lalthangliana

  • COVID-19 hri pui inkaichhawnna chhu chat turin sawrkarin theihtawp chhuah
  • Sample test runpui niin emergency sample test pawh hmun eng emaw zatah hlawm lian deuhin kalpui
  • Hri kai hmuhchhuah hma a, lakhran zung zung tumin theihtawp chhuah, 

  • ZMC ICU khum 34 ah khum 33 luah, ventilator mamawh mi 21 awm. ZMC-ah damlo leh anmahni awmpuitu mi 320 awm mek.


Aizawl | August 16, 2021: Vawiin khan SAD Conference Hall, MINECO ah August ni 21, 2021 zanlai thlenga AMC huamchhunga partial lockdown leh Mizoram chhung hmun danga inkhuahkhirhna kalpui dan thlirho a ni a. He hun hi Health & Family Welfare Minister Dr. R. Lalthangliana'n kaihruaiin, IDM&R Minister Pu Lalchamliana, AMC Mayor Pu Lalrinenga Sailo, Chief Secretary Pu Lalnunmawia Chuaungo, School Education leh Higher & Technical Education hotute bakah Health Department hotute, Police hotute, Aizawl DC, Aizawl City Local Council Association, MKHC, IMA leh NGO Coordination Committee aiawhte an tel a ni.

Health Minister Dr. R. Lalthangliana chuan Total Lockdown puan chhung leh partial lockdown puan chhung hian Aizawl khawpui leh Mizoram hmun hrang hrangah COVID-19 hri pui inkaichhawnna chhu chat turin theihtawp kan chhuah a, sample test runpui hmun tam takah neih niin emergency sample test pawh hmun eng emaw zatah hlawm lian deuhin kan kalpui a, hri kai hmuhchhuah hma a, lakhran zung zung tumin theihtawp kan chhuah a, hei hian rah tha a chhuah tan ta niin a lang a, tunhnaiah hri kai thar zat a tlakhniam bakah ZMC leh hri kai enkawlna hmun hrang hrang phurrit pawh a zangkhai ta niin a lang a ti a. Amaherawhchu kan ziaawm anga kan lan lai hian kan in thlahdah palh ang tih a hlauhawm a, mimal tin kan fimkhur zual sauh sauh a tul hun lai tak a ni, tiin, inthlahdah a la hun lo tih a sawi a ni.

Dr. Pachuau Lalmalsawma, SNO, IDSP in report a pek danin COVID-19 first wave ah khan naupang kum 18 hnuailam positive mi 513 awmin chu chu positive hmuhchhuah zawng zawng 4476 atanga chhutin 11.46% an ni a. Second Wave ah August ni 15, 2021 thleng kum 18 hnuai lam positive mi 12,529 awmin second wave a positive tawh zawng zawng mi 43,986 atanga chhutin 28.48% an ni a, hei hian vaccine la la ve thei lo kum 18 hnuai lamte third wave lo thleng tur an sawi lakah kan venhim a tul zia a tilang chiang hle a ni, a ti.

Lengpui Airport-a khualzin lo thleng zingah July thla khan Airport-a positive hmuhchhuahn mi 16 an awm laiin August ni 1 – 14 inkar khan mi 24 an awm a, Mizoram pawn atanga lo hawte endik chungchangah kan fimkhur hle a ngai leh tawh a ni, a ti.

Meetingah hian tun dinhmunah Aizawl district ah veng/khua 20 ah Containment Zone puan mek a nih thu tarlan a ni a, hlih tawhna veng/khua 84 ah a awm a ni.

ZMC dinhmun ngaihthlak niin vawiin chhun khan ICU khum 34 ah khum 33 luah niin, ventilator mamawh mi 21 an awm a, ward hrang hrangah damlo leh anmahni awmpuitu mi 320 an awm mek a ni. SEDP hmanga siam Oxygen plant 200 lpm chu tunah hian a khawl tihnun reng a ni a, PM Cares atanga hmuh 300 lpm pawh rim taka hman niin, PM Cares atanga hmuh tho 1000 lpm pawh a khawl dahna tur in sakna bungrua ramri buai vanga Guwahati atanga rawn kal thei lo chu vawiin khan Aizawl rawn phurh thlen a ni a, a bun hnathawktu CPWD te chuan naktuk atang an khawih nghal tur thu leh zawh fel thuai an inbeisei thu an sawi tih tarlan a ni. RTPCR hmanga sample test chungchanga khaihlak awm pawh tunah chuan chinfel a ni tawh a, test kit engemawzat rawn thlen belh tawhin tunah hian 20000 chuan rawn thleng leh thuai tura beisei a ni.

COVID-19 hri kaite enkawlna tur atana ruahman DCHC pahnih MRB Head Office, MINECO leh Kulikawn Hospital te chu damlo admit theih an ni tawh tih tarlan a ni a, Mualpuia Sports Council Hostel DCHC pawh peihfel thawkhat tawh a ni. Aizawl district pawn lamah hripui a darh tan tih tarlan niin a bik takin Kolasib district leh Lawngtlai district te chu vil uluk lehzual an tul nia sawi a ni.

Scool Education department hotute chuan Thingtlang lama hri kai awm lohna khuaah te zirna in hawng tan turin ruahmanna an siam tih sawiin, khawtlang hotuten an ngenna ang bawhzuiin District Bawrhsap kaltlangin uluk taka endik a nih hnuah phalna te hi pekchhuah tura ruahmanna siam a nih thu leh district thenkhatah chuan khaw engmawzatah DC ten phalna an pek tawh thu an sawi a ni.

Meetingah hian zirtirtute leh sikula thawk non-teaching staff te COVID-19 vaccine pek kim thuai a tul thu tarlan niin, vaccination drive a tul anga nei turin ruahmanna siam tha an ti a ni.

AMC Mayor Pu Lalrinenga Sailo pawhin High Courth thutlukna anga COVID-19 hnawmhnawk leh bawlhhlawh paih hun engemaw c hen a khaihlak chhungin ruahmanna an siam a, tunah chuan a paihna tur hmun an nei fel tawh tih sawiin, felfai takin ruahmanna an siam tih a sawi a, DCHC, CCC leh CCCC thenkhatte bawlhhlawh paihna tur pawh a hmun hnaiah an buatsaih tih a sawi bawk a. Hripui vanga chhuanchham thei dinhmuna dingte tak an veng LTF kaltlangin AMC chuan pawisa cheng nuai za chuang an sem chhuak tawh tih a sawi bawk a ni.

Attachment

Post a Comment

He post chungchanga i ngaihdan lo sawi ve rawh:

Previous Post Next Post