ṬAWNGṬAINA CHUAN RILRU LAMA CHAK LOHNA A TUAM DAM

ṬAWNGṬAINA CHUAN RILRU LAMA CHAK LOHNA A TUAM DAM

- Rick Warren

- 27 July, 2021

“Tin, lal chuan a chhang a, Pathian mi hnenah chuan, ‘Ka kut hi a lo dam leh theihna turin Lalpa i Pathian khawngaihna ngen la, mi ṭawngṭai sak teh khai,’ a ti a. Tin, Pathian mi chuan Lalpa hnenah a ngen a; tin, lal kut chu a lo dam leh a, a hma ang bawkin a lo awm leh ta a.” 1 Lalte 13:6

Rilru lamah zengin, lusunna, hlauhna, sual nia inhriatna emaw zak taka awmnate i nei tawh em? Kei chuan ka nei. Rilru lamah chuan engmah ti thei loin i inhre mai thei – mahse chu chu a dik lo a ni. Rilru lamah zenga i awm khan, ṭawngṭaiin tuamdamna hna a thawk a ni.

Thuthlung hlui ah pawh rilru lama harsatna nei Lal Jeroboama kan hmu a ni. Pathianin lal chu a hma lam hun chungchang hrilh turin mi a tira, mahse lal chuan a chungchang sawi chu a lawm lo a ni. A nihna takah chuan Lal Jeroboama rilru chu buaiin, a thinrimna chu a so sang hle a – a chhan chu ama chungchanga thu dik tak leh thil lo thleng tur sawi lawkna chu a ngaithla duh lo a ni.   

I chungchang thu hi dik takin an lo sawi ve tawh em? I chungchang ṭha lo lam hrilh chu i duh lo mai thei. A nih loh vek pawhin harsatna thlentu chu nangmah i ni tih hrilh che sela, rilru lamah hrehawmna nen i chhang let mai thei. Chu chiah chu Lal Jeroboama chunga thil thleng a ni. 

Chutichuan, 1 Lalte 13:4 ah chuan, “Pathian miin Bethel-a maicham a han au khum thu lalin a hriat chuan, Jeroboama chuan, ‘Man rawh u,’ tiin maicham aṭang chuan a kutin a han ban a. Tin, man tuma a banna kut chu a lo zeng ta a; tichuan, a la leh thei ta lo va.” A rilru chu a lo buai zuala, a kut pawh chu a lo zeng ta a ni.

A dawta thil lo thleng hi a mak deuh a sin. “Tin, lal chuan a chhang a, Pathian mi hnenah chuan, ‘Ka kut hi a lo dam leh theihna turin Lalpa i Pathian khawngaihna ngen la, mi ṭawngṭaisak teh khai,’ a ti a. Tin, Pathian mi chuan Lalpa hnenah a ngen a; tin, lal kut chu a lo dam leh a, a hma ang bawkin a lo awm leh ta a.” 1 Lalte 13:6. Lal Jeroboama chuan ṭawngṭaina lo chuan a dam dawnlo tih a hria a ni.  

Vawiina zeng natna i neih mek hi eng nge ni ve le? I rilru lam pawh a ni thei. Pathian lam hawi la tichuan midang ṭawngṭaipui tur chein ngen rawh le. Chutiang chuan Lal Jeroboama ngei pawh a kut chu a pangngai ang chiahin ṭawngṭai avangin a dam leh a, Pathian chuan i rilru lam i hman dik chuan damna chang turin a pui thei che a ni. 

Ṭawngṭaina chu rilru lama hriselna i neih leh theih nana pawimawh tak a ni. Chumi tello chuan damna tluantling a awm theilo a ni.

Han ngaihtuah la

Eng hawi zawnga inbiakna hian nge rilru lama chhanlet duhna neih tir che? 

Rilru thianghlim taka midang chhanletna entirna ṭhenkhat eng te nge ni ang le?

Engtiangin nge Pathianin i rilru lam chu amah i hnaih zual theihna turin a hman theih i rin?

[Lettu: Sangpuia]