ṬAWNGṬAIIN I HMATHLIR CHU NEI LET LEH ANG CHE

- Rick Warren
-July 28, 2021



Anni chuan a hnenah, "Mit var kan duh," an ti a. Tichuan, Isuan a khawngaih em em a, an mit a dek a; tichuan an hmu thei ta nghal a, amah chu an zui ta a. Matthaia 20:33-34 

Tunlai i thil thlir dan eng nge ni le? Lungawina leh lawmna rilru puin i awm mai thei. Chutiang mi i nih chuan - a ropui lutuk! Nimahsela, rilru ṭhalo pu emaw kawng dik ngaihtuah theihna i hloh tawh a nih chuan, Pathianin i hmathlir chu nei let leh turin a duh che a ni.

Mahse chu chu ṭawngṭaina chauhin a thlentir thei a ni.

Chin dawklak i neih avanga i tanna emaw thinlung hliam emaw rilru lama natna avang emaw tein i hmalam hunah pawh talchhuak thei lo tur a inngaihna i nei mai thei. Inlaichinna ṭha lo, rilru ṭha lo emaw nun dan mawi lo emaw te pawh a ni mai thei e. Eng thil pawh lo nise, ṭawngṭaina hmang chuan i hmathlir chu i nei let theia, i la hmuh ngai reng reng loh tur pawh i hmu thei a ni.


Bible-ah mitdel pahnih an ṭawngṭaina avanga an dam leh thu kan hmu a. Tin, ngai teh, mitdel pahnih kawng sira ṭhu chuan Isua a kal tih an hriat veleh, "Lalpa, Davida fapa, min khawngaih rawh," tiin an au va Matthaia 20:30. Hei hi nimin lama kan zir Lal Jeroboama anga lungrun taka ṭawngṭaina a ni.

Mahse mipuite chuan mitdel pahnih chu ngawi turin an ti a. Anni chu an au ring zual sauhva. Tin, Isua a ding a, anmahni a ko va, "In chungah engtia ka tih nge in duh?" a ti a. Matthaia 20:32. He lai tak hi ka duh hle mai. Isuan an duh a thlantir a ni. Chutiang chiah chu i chunga a tih dan tur che pawh a ni. I mamawh chu hrilh turin a duh che a ni. Tichuan eng hun pawha Isua hnena i thu thlen chu, i ṭawngṭaina a ni.

Anni chuan a hnenah, "Mit var kan duh," an ti a. Tichuan, Isuan a khawngaih em em a, an mit a dek a; tichuan an hmu thei ta nghal a, amah chu an zui ta a Matthaia 20:33-34.

Chu chu tih dan tur ṭha a ni lo vem ni? I ṭawngṭaia, i dam leh a, i zui ta a. Tichuan Pathian thlirna aṭangin hringnun chu i thlir thiam ve ṭana, ila hmuh ngai reng reng loh thil te chu i hmu ta a. I kawppui, i ṭhian, i chhungkua, i thawhpui leh mikhualte thlengin hlutna nei, pawm tlak leh ngaihdam tlak angin i hmu a. Nangma chungchang ngei pawh i inhmu a. I thil thlir dan zawng zawng te chu a inthlak ta hlawk a.

Marka 6:34 a kan hmuh angin "Isuan ... mipui tam tak a hmu a, vengtu nei lo beramte ang an nih avangin a khawngaih ta em em a, thu tam tak a zirtir ta a." Mipuite chu khawngaihna nena a en ṭhin avangin, nang pawh mahni chungah, i lainate chungah, i vengte chungah, i ram chungah leh khawvel puma mite chungah khawngaihna nei let leh turin a duh che a ni.

I hmathlir chu nei leh turin Pathian dil la, tichuan amah i zui anga, mipuite pawh Isuan a en dan angin i en ve thei ang .

Han ngaihtuah la

Rilru/ngaihtuahna ṭha lo paih bo ngai nangmahah a awm em?

I mamawh tak Isua i hrilh theih lohna chhan eng nge ni le?

Midang leh nangmah ngei pawh i in hmuh danah eng nge Pathianin neihtir che emaw thlakthlengtir che sela a duh nia i hriat?

[Lettu: Sangpuia]

Post a Comment

0 Comments