SPAIN v/s ITALY

- K Remruatfela

Manager:

Footballer hlui ve ve an ni a. Major tournament-a ram tan khel thei ve ve an ni bawk. Chutihalai erawh chuan players langsara sawi tur an ni lo ve ve a. Managerial career lamah erawh mi lian ve ve an ni thung. Italian Mancini hian 20 years experience a nei tawh a, Spainish Enrique pawhin kum 12 lai tawnhriat a nei tawh bawk. Tactic lamah tu nge tha zâwk hriatthiam an har hle a. Club lian tak tak lo enkawl tawh an nih avangin achievment lamah pawh an duai lo dûn hle. Players a remkhâwm danah Italian Mancini hian fak chu a hlawh hrih deuh zâwk niin a lang.

Goal Keeper:

Kum 25 hnuailam ve ve, major tournament-a ram tana goal vawikhat venna ve ve an ni a. An che tha dun em em lehnghal a. Italian Donnarumma hi Serie A goal keeper tha bera puan lai ni a a, teenager nih laia ram tana goal veng ngat thei tawh a ni. Spanish Simòn pawh hi La Liga lama Athleic Bilbao rinrâwl a ni a. Croatia nen an intum tuma a chesual zeuh tih loh kha chu a che tha hrih hle. Football market-ah chuan Italian Donnarumma hi a sâng zâwk dâwn tih chu hnial rual a ni lova. Tuna an khelh chinah chuan Golden glove dawng thei tura mi rin hlawh ve ve an ni.

Defence:

World class Defender nei lo ve ve an ni a. Italy hnungdâwl ho hi kum 30 chuang an nih nual tawh hlawm avangin tournament tan hma kha chuan duap deuh tawh tura ngaih an ni thin a. Mahse, rin phák bakin an la khawng hle a nih hi! Spain lam hi an la thalai zek zawk a, duhthusâmin la inman hrih lo mah se, an che a rang em em a. Tawkkhirh tur tak tho an ni. Tun Euro chhunga Left back che tha bera ka ngaih, Spinazzola khel thei tawh lo tur hi Italy tân chuan chânna nasa tak a ni dawn a. A aiawh tura ka beisei, Chelsea Emerson hian hmunruak a hnawh khah zawh loh hle ka ring bawk. Spain lam hian hmatâwng phit chak kan tih ang chi hi an nei lo hlauh a. Italy tân chuan vanneihna nasa tak tur a ni ringawt.

Midfield:

Italy tluka Midfielder nei tha hi khawvel ram dangah pawh an awm loh hial ka ring a. Barella, Veratti leh Jorginho inkawp tluka field laizawl thunun thei tur hi team dang an awm lo ang. Bench-ah lah Locatelli, Christante leh Pessinna an la nei cheu a. Heng mite pawh hi team danga khel chu ni se rinrâwl tlâk vek an la ni. Busquets lo lêt leh tawh hi Spain tan chuan thu lâwmawm tak a ni a. Rawlthar Pedri ke kal lai tak a lo ni bawk a. Spain Midfielder ho pawh hi an tha hlawm tak zet! Koke leh Rodri pawh hi mal khaia lâk chuan players tha tak an ni a. Mahse, team anga bul tan chho mêk an la nih avangin Xavi leh Iniesta vânglai erawh an la pha lo hle tih chu a chiang. Match 3 dang an khelh leh hnua intum chauh tur chu ni se an inbûktawn chho viau pawh a rinawm tawh. Tun dinhmunah chuan Italy lam hi an langsar mah zâwk a ni a tih theih ang.

Forward:

Euro tan a nih dâwn khan France nge Belgium leh Italy hi hmatâwng nei tha zâwk ang aw ka ti thin a. Anni 3 zinga ka rin loh deuh ber, Italy tlar hma te hi an tha ber zâwk zawmah ta em aw a tih theih. Pa te tuan tha Insigne an nei a. Goal specialist Immobile a awm leh a. Ding lama nawr tur Chiesa leh Berradi duhthlan tur a la awm cheu a. Tha tlâng tak an ni. Spain lam erawh tlar hma duhthusâm an nei lo tih hi phat rual a ni lova. An innghahna ber Morata hi a finishing a that em em rualin, a zawi hnenghnuang si a, Italy tlar hnung uai thla lam tawh tân chuan tawrhhlehawm vak a ni lo ang. Mbappe te ang vat vat kha hmachhawn tur ni se la chuan Italy tlarhnung uaithla lam pang tawhte hian fiah an dâwl zawh ka ring vak lo thin a.

Team pahnih khaikhinna:

FIFA ranking lamah erawh chuan Spain hi an sâng zâwk a. Parukna niin an hnung chiahah Italy an awm. Tlar hnung ber atanga tlar hma khaikhinin Italy hi an sâng zawk niin a lang a. Nimahsela, Spain hian ball han khalh kual vel chu an thiam fe zâwk tih a chiang thung. A nih ang turin an la in man chiang tâwk lo mai mai a ni tih pawh chîk taka an inkhel en thintu te chuan kan hre thei ang. Italy thatna ber chu an tha rual hi a ni a. An tlar hnung a phui a, an tlar hma an khawng leh tho si a. Hei tak hi Spain in an tluk lohna lâi tur chu a ni.

I lo en bik turte:

Field laizawl kil lamah rawlthar ball thiam em em pahnih Spanish Pedri leh Italian Barella te an inbitum hmel a. Kum 25 hnuai lam ve ve, vanglai hmang chho mek ve ve an ni a. Hemi pahnih in check tur hi ka en châk ber an ni. Chu lo lehah chuan Italian Insigne ball um par par lai, Spanish senior player Jordi Alba in dan a lo tum thin tur lai hi a ni bawk. Formation ngai anga an kal chuan anni pahnih hi an inbitum ngei dâwn tih a chiang a. Insigne ball lâk phei dân thin lo dan hi Jordi Alba thiam zâwng tak ni-a ka hriat a ni a. Ball kâng ni lova ground ball-a an han inlîm kual vel tur hi en a châkawm tawh tak zet!

Inkhel en tui vek u le..