Aizawl | July 27, 2021: Mizo Students’ Union (MSU) General Headquarters Aizawl chuan Mizoramin kum eng emaw zat ramri chungchanga buaina kan neihah mipuite duhdan ang taka Ram chhannan leh mipui te thlavang hauh nana silai hmehpuah a ni ta chu hmasawnna pakhatah ngaiin, Chief Minister Pu Zoramthanga leh Home Minister Lalchamliana te chungah lawmthu an sawi a, hnung tawlh lova hmalam min pan pui zel turin duhsakna an hlan.
Thuchhuah siamin MSU chuan, "kan sawrkar hruaitute'n mipui duhdan taka huai taka thutlukna an siam hi lawmawm a ti a, a ṭul anga ramri venhimna thuamchak deuh deuh turin a ngena, ramri a CRPF te duty danah MSU chuan lungawithlakloh a ti a. Assam leh Mizoram ramri a duty zui zel tur hian rinngam harsa kan ti takzet a ni." an ti a,
Ramri buaiin a nghawng theih thil tam takah Mizo mipuite kan inlungrual a ngai hle a, MSU chuan "Sem sem dam dam" tih chhawm nung zel turin mipuite a ngen a, dawrkaite pawh "Dam leh tlang khatah" tih thupui a nei tlat turin a chah bawk a ni.
MSU chuan, ramri daido khuate chungah lawmthu a sawi nawn a, Vairengte khaw mipui inpekna leh Mizoram Police te huaisenna chu a fak tak meuh meuh a, ramri chhan nana inpete chu a tawp thlengin a thlawp zel dawn, tih tarlangin, kan buainate hi chinfel a nih thuai theih nan chak taka hma la zel turin sawrkar pawh a ngen nawn a ni.
Post a Comment
He post chungchanga i ngaihdan lo sawi ve rawh: