RAMRI HMUN THUMAH ASSAM POLICE LEH FORESTER TE RAWN KAL LEH

Vairengte | July 3, 2021: Vawiin Dt.3.7.2021 khan Phainuam lam Buarchep hmun a leilet bul vel leh Vairengte a Aitlang mawng lam, Pu Dokunga phai bul vel ah Assam Police leh Forester mi engemawzat an lo kal leh ni a thu dawn a ni. Phainuam VCP Pu Rochungnunga hnên atanga thu dawn danin tukkin zing dar 8-9 vel khan Assam Forest DFO hovin Assam Police silai keng mi 7 vêl leh Forester  mi 3 vel te chu Vengchhak lama leilet hmunah lo kalin hêng mite hi phai(leilet) ah zêl an kal chho a, Pu Zangena te leilet thleng kalin an let leh a ni. Heng Assam police te hi Phainuam VC te leh Mizoram Police duty te chuan an lo kal chhan te zawtin an sawi tha duh vak lo niin an sawi a, an lo kal vel mai mai angin VC te hi an hrilh ni a thu dawn a ni a, harsatna leh buaina awm lovin an let ve leh mai niin VCP chuan a sawi bawk.


   Hetihlai hian vawiin chawhma dar 10 :00 vel khan Vairengte a Aitlang lui, mawng lam , Pu B Dokunga phai chhak , Bilaipur panna tlang vel ah Assam police leh Forester mi 30 an lo kal a. Heng Forester ho hian Bilaipur panna kawnga an miten an ram chinah hmunphiah huan an siam chu Forest thlai ang chi phun tûrin an rawn ti ni a thu dawn a ni. Henglai ram tlang hi mizo leh hnamdang ten hmunphiah huan an siam nasa hle ni a thu dawn a ni bawk. Heng AP leh Forester ho hi  chhun dar 12 vel khan an kir ve leh a ni. Hemi chungchang hi hriat anih ve leh Vairengte atang pawhin Mizoram Arm Force leh Vairengte khawthlang hruaitute a hmunah kalin an zuk thlen hian an awm tawh lova, ramri vel an en thli thlai nghal ni a thu dawn a ni bawk. Hetihlai hian helai hmun tlang dung vel en thlithlai hian MZP General Hqrs. hruaitute pawh an lo kal ve ni a thu dawn a ni bawk.




    Tin vawiin vek khan Vairengte chhuah lam, Mautui lui lamah pawh Assam Police leh Forester te hi mi 30 vel lo kalin Pu Zohminga phai thleng an lo kal a. Hei hi hriat anih ve leh Mizoram Police leh khawtlang hruaitute kal ve nghal in an zuk thlen hian an lo awm tawh lova, hei vâng hian an lo kal chhan hi chiang tak hriat theih ani lo ni a thu dawn a ni. Tarlan tawh angin Assam lam hian Vairengte leh a chhehvêl a ramri te an ram chin ni a an hriat te tunlai hian an rawn tlawh fo ani.



   Hetihlai hian tunlai hian Vairengte leh a chhehvelah Inbiakpawhna mobile phone Network a chhe hle a. Airtel leh Jio hman tlang pui niin tawng inhriat theih loh leh inbiak mumal theih lo a tam hle a ni. Hei hi ramri buai thil inbiakpawh zung zung theihna tûrin harsatna a awm thin ni a thu dawn a ni bawk.

*Rengkhawpui news Dt.3.7.2021 4:00 pm*

Update :  (vawiin tlai dar 5 vel khan Assam police motor trip 5 vel in. Buarchep, Phainuam bul ah an lo kal niin an hmun a IR awm teh an sawi a, chanchin kimchang ngaihchân mek ani)



*MZP HRUAITUTE RAMRI BUAINA HMUNAH*

Vawiin 03/07/2021 Inrinni zing dar 6 khan Vairengte  Aitlang ramri buai enfel turin,

1. *Pu Petera  chhangte Vice President*

2. *Pu Lalnunmawia Pautu Gen. Secretary*

3. *Pu Jacob Lalmuanpuia Asst Gen. Secy.*

4. *Pu Chinkhanmanga Thomte Fin. secy*
5. *Pu Lalthakima Secy i/c Publicity*

6. *Pu Ricky  Lalchhandama Ecm* te an kal a, Kolasib  Headquarters leh Vairengte Sub-Headquarters hruaitu ten an tawiawm bawk ani.

Post a Comment

He post chungchanga i ngaihdan lo sawi ve rawh:

Previous Post Next Post