PUC hnam lam video 'Chhawkhlei: Lamlian Lehlam' July 30-ah


Aizawl | July 25, 2021: PUC Chhawkhlei Cultural Club buatsaih Mizo hnam lam video 'Chhawkhlei: Lamlian Lehlam' chu July 30 chawhnu dar 1 hian tlangzarh a ni dawn ta.



Pachhunga University College (PUC) zirlai nula leh tlangval hmeltha tak tak te'n tha leh zung, rilru leh ngaihtuahna senga an buatsaih hnam lam video siam hi a hmuhnawm hle tura rin a ni a, an bei ulukin an thawkrim a, zirlaite an phur hle a ni.


PUC Students' Union Cultural Secretary Lalhruaitluangi Hnamte chuan, "Zirlaite kan phur hle a, chu mai bakah kan principal te'n min tuipui em em a, principal kalchhuak ta Dr Tawnenga phei chu he video -ah Lalpa angin a inlan nghe nghe a. Chuan, Ka SU puite leh he video buatsaih nana committee bakah Cultural Member te inpekna a fakawm takzet a ni" a ti.


He hnam lam video-ah hian Mizo hnam lam chi hrang hrang; Dakcha Lam, Sarlamkai, Tlanglam, Buhza Aih Cheraw, Rawkhatlak/Zialung Cheraw/Ram Kalsiam, Khuallam/Thingdim, Chheih Lam, Chawn Lam (Lam Lam + Tinna Lam), Solakia, Paikawng Lam, Dar Lam leh Chawnglaizawn te pholan a ni dawn a. Mizo hnam thuam hrang hrang a tam theih ang ber lantir a ni a. Zo hnahthlak hnam hrang hrang thuam pawh hmuh theiha tihlan a ni.


Chhawkhlei Cultural Club hnam lam video 'Chhawkhlei: Lamlian Lehlam' hi Sialsuk, Falkawn Zokhua, Tlawng lui - Tanhril kai leh Reiek kai, Ailawg Kurung, PUC Multipurpose Hall leh PUC Playground bakah Sakawrhmuituai tlang-ah te an shoot a, Green screen hman a ni bawk. He Video buatsaih nan hian thla khat tling lo hret an hmang a ni.


He hnam lam video-a Director hi Paia Pachhuau a ni a, Choroegrapher hi Vanlalrinnunga niin, Costume hi Lalduhawma khawih a ni a, Video hi Asanga Dosel kutchhuak a ni.


Chhawkhlei Cultural Club hi Pachhunga University College hnuaia cultural club a ni.

Post a Comment

He post chungchanga i ngaihdan lo sawi ve rawh:

Previous Post Next Post