NESAC Society Meeting-ah Mizoram CM a tel

Aizawl | July 24, 2021: North Eastern Space Applications Centre (NESAC) Multipurpose Convention Centre, Meghalaya-ah vawiin khan Union Home and Cooperation Minister Pu Amit Shah a kaihhruaiin India hmarchhak state Chief Minister-te chu NESAC Society Meeting-ah an thukhawm. DoNER Minister Pu Gangapuram Kishan Reddy leh Union Minister of State Pu Jitendra Singh te pawh telin, India hmarchhak state ten NESAC space technology chu hmasawnna atana tangkai zawka an hman theih dan tur an sawiho a ni.


NESAC Society Meeting-ah hian Chief Minister Pu Zoramthanga pawh a tel a; State in hma a lo lak tawhna te sawiin, hmasawnna ki hrang hrang atana ruahmanna thar siam te a tarlang bawk. Chief Minister chuan agriculture leh allied department tihhmasawn leh tourism tihchangtlun kawngah te, ruahtui khawl leh tuihna dinthar chungchanga hmalakna thar tha tak tak awm thei te a sawi a. Mizoramah chuan MIRSAC hmalakna hnuaia space technology chu hmalakna hrang hrangah hman tangkai a nih thu sawiin, huapzau zawk leh tangkai zawka space technology hi hman tangkai a nih theih nan state-in heng atana project a thehluh te chu ngaihpawimawh sak ngei a tul thu a sawi a. North East Spatial Data Repository (NESDR) portal-ah Mizoram data thehluh fel a nih thu leh NESAC in NEC-Project geo-tag tura list a siam te pawh geo-tag zawh fel vek a nih thu leh hmalak tawhna dangte a report bawk.


Vawiin meeting zawh hian Union Home Minister Pu Amit Shah hian NESAC Multi-purpose Convention Centre-cum-Exhibition Centre atan lungphum a phum bawk a ni.


NESAC hi society pakhat, Department of Space (DOS) leh North Eastern Council (NEC) thawhdunna rah a ni a. Kum 20 chuang hmarchhak state pariatte hman tangkai turin space science leh technology lamah hma a la a. Operational remote sensing leh geographic information system hmanga leilung hausakna a tangkai thei ang bera hman te, hmasawnna ruhrel ruahman leh din kawngah te, zirna, healthcare, chhiatrupna laka invenhimna leh thildang atana operational satellite communication applications service pek te, zirchianna (research), etc. atan hma an la thin a ni.

Vawiin hian Mizoram Chief Minister hi Chief Secretary Pu Lalnunmawia Chuaungo in a tawiawm a ni.

- DIPR

No comments

He post chungchanga i ngaihdan lo sawi ve rawh:

Powered by Blogger.