National Talent Search-ah Mizoram zirlai pathum tling

Aizawl | July 20, 2021: National Council of Educational Research and Training (NCERT)-in tun hnaia National Talent Search Examination-2020 result a tihchhuahah Mizoram atangin zirlai pathum an tling. NTSE a inziak tlingte hi :
1. Lalkhawngaihi, St Pauls HSS
2. Samuel C Vanlalpeka, St Pauls HSS
3. Simon Lalremsiama, St Pauls HSS te an ni.

NTSE hi kum tin class X zirlaite tan buatsaih thin a ni. State leh National Level a awm a, State Level chu India ram hmun dang zawngah kumtin November Pathianni hmasa berah neih thin a ni a, Nagaland, Andaman and Nicobar Island, Meghalaya leh Mizoram-ah te chuan Sunday hi ni pawimawh a nih avangin November Inrinni hmasa berah neih thin a ni thung. National Level chu kumtin May Pathianni vawi hnihnaah neih a ni a, State Level-a tlingten an exam leh thin a ni.

NTSE-ah hian Paper pahnih a awm a, Paper I- Mental Ability Test (MAT) leh Paper II Scholastic Aptitude Test (SAT) te an ni. Multiple choice kalhmang ve ve a ni a, Scholastic Aptitude Test-ah hian Science atangin item 40, Social Science atangin item 40 leh Mathematics atangin item 20, a vaiin 100 chhan tur a awm a; NTSE-a tlingte hian thlatin scholarship an hmu thin a ni.

Scholarship hi tuna scheme hman laiah chuan Science leh Social Science-a doctoral degree thlenga zir tumte leh professional course heng medicine leh engineering zir zui tumte pek thin a ni. Scholarship hi ram pumah mi 2000 hnenah pek thin a ni a, SC tan 15%, ST tan 7.5%, OBC tan 27% leh vohbik zirlaite tan 4% hauhsak thin an ni. Scholarship hi Higher Secondary tan thlatin Rs 1250/-, Graduate leh Post Graduate tan thlatin Rs 2000/- Ph.D tan kum 4 chhung UGC norms angin pek thin a ni.

NTSE-ah hian hun engemawchen chu Mizoram atangin naupang an tling thei lova, SCERT leh Samagra Shiksha ten a theih ang angin tan an la a, naupang pathum an inziak tling thei ta a ni.

- DIPR

Post a Comment

He post chungchanga i ngaihdan lo sawi ve rawh:

Previous Post Next Post