Covid vanga thite pual hla thar
'Kan ngai vawng vawng che'
Covid-19 hripui lengin khawvel a tuam chhuak a, kan ramah ngei pawh mi eng emaw zatin an thihpui tawh. Hetiang a nih mek lai hian Covid vanga thite pualin hla thar a piang a, 'Kan ngai vawng vawng che' tih a ni.
He hla hi R. Thanchhunga phuah a ni a, a thu that zia hi ngaihtlak loh chuan sawi fiah mai theih pawh a ni lo. Covid-19 avanga harsatna kan tawh natsat zia te, hripui vanga thihte leh an chhungte khawngaihthlak zia te tarlan a ni. Vanduai thlak taka nunna chante ruang an chenna inah pawh lakluh lohte pawh an awm a, chung zawng zawngte chu he hlaah hian tarlan a ni bawk.
'Kan ngai vawng vawng che' tih hla hi Lily Lalthakimi chuan a sa a, a aw nen a inmilin ngaihthlak pawh a manhla hle. Lily hian kuminah music video pahnih a lo tichhuak tawh a, tuna mi hi a pathumna tur a ni.
A hla chungchang sawiin Lily chuan,"Chhiat tawh rau rauah a rilru nat thlak leh zual hle a, an ruangdai tak ngial pawh lainattu leh chhungte takngial pawhin an kil thei lo hi a rilru nat thlak hle a ni. Covid-19 avanga boral ta zawng zawngte pual a ni a, an tan ka hlan a ni," tiin a sawi.
Covid vanga thite pual hla thar 'Kan ngai vawng vawng che' tih hi Tlau Entertainment YouTube channel-ah en theih a ni.
YT Link: https://youtu.be/YvX6m3FWMP0
Post a Comment
He post chungchanga i ngaihdan lo sawi ve rawh: