Kolasib bawrhsap-in Thingdawl-a Plastic (Waste) Resource Management Centre hawng

Kolasib | July 23, 2021: Vawiin chawhma khan Public Health Engineering Department, Kolasib WATSAN Division hnuai a sak, Plastic (Waste) Resource Management Centre, Thingdawl chu Dr.H.Lalthlangliana, Deputy Commissioner-in a hawng a, Er. H.Lalsiamliana, Sr.E.E chuan he hun hi a kaihruai a ni.




Dr.H.Lalthlangliana chuan plastic chu thil tangkai tak ni si, hman zawh hnua sawngbawl that loh chuan thil hnawksak ber ang hial a chhal theih ni bawk si a nih thu tarlangin hetianga mumal tak a sawngbawl theihna tur hmun Plastic (Waste) Resource Management Centre, Thingdawla hawn theih a buatsaih a ni chu lawmawm a tih thu a sawi. Plastic bawlhhlawh titlem tura mitinin kan zawm ngei ngei ngai Dr.H.Lalthlangliana chuan tarlangin chungte chu plastic atanga siam thil hman tlem, hman nawn theih theih hman nawm zel leh thil dang tangkai siam chhuah nana sawngbawlte a nih thu a sawi a, thil tangkai a siam chhuah leh nana hmanraw pawimawh tak chu Plastic (Waste) Resource Management Centre hi a nih thu a sawi bawk a ni. Plastic-in khawvel leilung leh tuifinriat a nungchate thleng a nghawng nasat zia tarlangin uluk tak a plastic sawngbawl a nih theih nan sawrkar laipui pawhin 2016-a Solid Waste Management Act-a duan ah khan bawlhhlawh dang zinga plastic thliar hran dan tur a tel thu a sawi a Mizoramah pawh 2019 atang khan hetiang zulzuia dan siam a nih thu leh he dan hnuaiah hian plastic micron 50 aia pan hman phal a nih loh thu a sawi bawk a ni. Kolasib DC chuan PHE Department hnuai a PRMC hawn tak chu Kolasib district pum tan plastic bawlhhlawh sawngbawl kawnga a tak a hman tangkai a nih theih nan leh midangte zirtirtu ni tlak a enkawl zui a nih ngei theihna turin duhsakna a hlan nghal bawk a ni.

Hun kaihruaitu Er. H.Lalsiamliana, Sr.E.E chuan plastic hnawmhnawk leh plastic bottle-te chu sawngbawl hautak tak, hal ral dawn pawh a boruak thianghlim lo siamtu a nih avangin hman nawn leh tura a sawngbawlna hmun a thawn a tul thu a sawi a. Awmze nei tak a Plastic (waste) Resource Management Centre-a Baling machine-a nem muk a nih hian sawt leh zualin a sawngbawlna tur hmunah thawn thlak zung zung a theih tawh tur thu a tarlang a ni.  


Plastic (Waste) Resource Management Centre, Thingdawl hi SBM (G) hnuai a Rs. 16,00,000 hmang a sak niin Plastic Baling Machine leh Baling machine bunna tur RCC building te a awm a. Ni 20 September 2021 a sak ╚Ťan niin ni 17 March 2021 khan sak zawh a ni. Plastic nem mukna khawl, Plastic Baling machine hi ni 17, July 2021 khan hlawhtling tak a enchhinna neih a ni bawk. Er. Lallawmpuia Sawthly, SDO tarlan danin Plastic (Waste) Resource Management Centre-a Plastic Baling Machine hian plastic bottle lak khawmte chu tonne 30 a ritin a nawr tawm thei a, bale khatah plastic bottle 600 atanga 650 bawr vel zel awmin darkar khatah bale 6 vel siam chhuah theih a nih thu a tarlang bawk a ni. 

Vawiin PRMC, Thingdawl hawnnaah hian Pu Gaston Vanlalhriatpuia, DUDO, Pu Hmingthanzuala, DIPRO, PHED, Kolasib WATSAN Division a thawktute leh Thingdawl khawtlang hruaitute an tel a, Pu R.Lalhmuakliana, JE, PHED chuan lawmthu sawina hun a hmang bawk a ni.

No comments

He post chungchanga i ngaihdan lo sawi ve rawh:

Powered by Blogger.