HSLC leh HSSLC Examination 2021 a topper te hnenah Chief Minister's Award hlan

Aizawl | July 10, 2021: High School Leaving Certificate leh Higher Secondary School Leaving Certificate Examination a zirlai tithate hnena Chief Minister's Award kumtina hlan thin chu nimin khan kum 2021 exam a tithate hnenah Chief Minister Pu Zoramthanga'n a hlan. Lawmman semna hi Education Centre Conference Hall-a School Education Department in a buatsaih a ni.

Chief Minister Pu Zoramthanga chuan India ram state zinga board exam pangngai taka nei thei awm chhun kan ni chu thil ropui tak a ni tiin, hemi atana Education Minister leh department thawktu zawng zawng te, nu leh pa leh zirtirtu leh zirlai zawng zawngte tih hram hramna leh thawhrimna chungah lawmthu a sawi. Mizoram chu India rama kilkhawr ber pakhat, mihring cheng tlem te, harsatna chi hrang hrangin a bawm, mamawh phur thlen hahthlak ber zing ami state state ni mahse malsawmna tam tak dawn thu a sawi.

Chief Minister chuan lawmmawn dawngtute a lawmpui thu sawiin, hrileng karah duhthusama inzirtirna kalpui theilo chunga zirlai zawng zawng te an theihtawp an chhuah chu chhuanawm a ti a. Hlawhtlinna changte chu ?anna ?ha ah dingin, an kal zelna turah pawh tha thlah lo turin a chah a. Uluk taka Pathian ?ih chunga mahni taksa hriselna enkawl chungin, tumruhna nena kal chuan India ramah a ber dinhmun an chan theih thu a hrilh a ni. Chief Minister chuan hlawhtlinna hi Pathianah a awm a, Pathianin hlawhtlin theihna hi mitin kutah dahin, kan nawrchhuah theih turin a siam a ni' tiin zirlai zawng zawngte a chah a ni.

School Education Minister Pu Lalchhandama Ralte pawhin HSLC leh HSSLC topper, Chief Minister's Award dawngtute chu a lawmpuina thu a sawi a. Hripui karah department in theihtawp chhuahin, class mumal taka kal hlei thei lo chung leh syllabus titlem a, online class nen buai taka kal chunga pangngai taka exam buatsaih theih a ni chu lawmawm a ti a. MBSE leh school hrang hrang leh zirlai chungah lawmthu sawiin, hripui do kawnga khawtlang mipui inlungrualna lanchhuahna pakhat a nih thu a sawi.

Minister chuan School Education Department chu Covid19 avanga department harsatna tuar nasa ber zing ami a nih thu sawiin, harsatna chhawk zangkhai turin remchanna dap zel a nih thu a sawi a. Online class buatsaih chu thenkhatin chhawr tangkai mahse harsatna hrang hrang avanga mu.al taka online class la ve theilo an awm thu a sawi a. Rualkhai zawka zirna pek a nih theih nan ruahmanna thar siamin, zirtirtute chu schoolah kal tawhin, headmaster/principal te enpuina hnuaia online class a mi tur inbuatsaih turin ruahmanna thar siam a nih dan te a sawi a. School building thenkhat covid vei enkawlna leh quarantine na atana hman a awm tih a hriatpui thu sawi bawkin Minister chuan heng hmun te hi Mizorama school awm zawng zawng atanga en in 10% bawr vel nia hriat a nih thu leh, chung school te tan chuan remchanna dang an lo siam theih thu leh, harsa chung chunga intihluihna a awm loh thu a sawi bawk.

Lawmman hlanna inkhawm hi School Education Secretary Dr. Lalzirmawia Chhangte chuan kaihruaiin, School Education Director Pu James Lalrinchhana chuan keynote address pe in, Joint Director Pu Lalhmachhuana chuan lawmthu sawiin hun a khar a ni.

Lawmman dawngtute chu hengte hi an ni:

HSLC:

Lalnunmawia

s/o RL Chanchinmawia & Saitluangi, Durtlang North, Aizawl

School: St. Joseph Hr. Sec. School

HSSLC:

Arts -

Sylvia Lalhmingmawii

d/o C. Thanga & Lalrelfeli, Tuikual South, Aizawl

Oikos Hr. Sec School

Commerce -

C. Lalrintluangi

d/o C. Lalduhawma & Lalbuatsaihi, P&E Veng, Serchhip

Oikos Hr. Sec. School

Science -

Lalengzauva

S/o Lalthakima & Lalbiakngheti, Ramhlun South, Aizawl

St. Paul's Hr. Sec. School

Chief Minister's Award hian Citation leh pawisafai Rs. 50,000 a keng tel a ni.