HRINGNUN LAMTLUANG

- SB Ngoliankima (Akima Sb)

Thingkungin a par a kalsan ngai lova, a par zawkin a kung a kalsan thin ang hian kan nun hman liam tawh, hman mek leh kan la hman turah hian a tute pawhin mahni tawkah harsatna kan tawk thin a, chu harsatna chu engti angin nge kan lo hmachhawn ṭhin?


Harsatna lo thleng ṭhinte kan lo dawnsawn dan leh kan lo hmachhawn dan azirin harsatna, mangana, lungngaihna, hlimna leh lawmna te kan nun hian a lo tawk mai thin zawk a. Thu khirh hriat thiam a harsa tluk zetin mi rinawm nih a awlai lo” tih erawh kan hriat nawn fo a tha. A thenin nun chu kan hlimpui em em laiin, a then chuan thih mai duh khawpin nun chu an lo tahpui thin. He nuna harsatna leh buaina lo hmachhawn thiama, Eng lam thlir tlat thinte chuan nun hlimna an chhar a, harsatna an tawh thinte leh an thil tih sual thinte chu insiamthat nâna hmangin, Eng chu an in hruaitir thin a ni. He nuna thim lo thleng thin hi a tha lo zawnga thlir thinte chuan an nunah harsatna, mangana leh thil tihsual an neih reng rengin, dam man a awm lo tiin an nun a lo nguai a, mahni nun hial lak duh khawpin an nun an lo hmang ta thin a, a pawi hle a ni.

Nangin engtin nge i nun hi i chhiar ve thin le? Kan nunah harsatna, manganna, lungngaihna leh thil tih sual emaw kan neiha kan lo hmachhawn chang pawhin beidawng mai tur kan ni lo. He nunah Pathian ngahchhana hmang chunga a êng zawng a thlir tlat thinte chuan chu eng ngei mai chu an inhruaitir a, thim a lo thlen pawhin chu êng chu an thlir ran a, a hruaituah an hmang a, chu êng chuan kawng dik leh tha a kawh hmuh a, chu kawng dikah ngei mai chuan an kal a. Hmangaihna hmunah te, beiseina hmunah te leh van hmun thlengin an kal a, an tum a lo hlawhtling thin a lo ni.

A thim zawnga nun thlir thinte chuan thim chu zawhin kalna ngaihna pawh hre lovin kawng chu an zawh a, an kalna kawngah hian êng a awm loh avangin an inchhuih  palh a, khuarah an tla a, an na a, kawng dik leh tha zawk hre reng chungin thimthamah kawng an zawh a, a thim em vangin kalna lai ber tur hre chang lovin mangang leh beidawng takin an kawng an zawh ve mawp mawp a, a tawpah êng hruaia awm lo na na na chu, khamah liamin an thih phah thin. Kawng dik leh nun khawchhuah theihna turin êng chu thlir tlat la, chu êng ngei mai chuan i tum ram hlawhtlinna chu a hruai thleng ngei ang che. 


"Thing zara sava fu hian tlak a hlau lo, thing zar ni lovin ama thla a rinchhan zawk vang a ni; mi dangah innghat suh, Pathianah chauh lo chuan"

Post a Comment

2 Comments

  1. Avan ṭha teh reng em... Ni e,kan innghahna hi a dik phawt chuan engpawh hmachhawn turin huaisenna kan nei ṭhin. Keimahni kan mihring chakna chauh rinchhana hmalam pan kan tum chuan hun harsa leh khirh zawk alo thlenin kan chau a,tho leh turin kan chakna neihin a tlin tawhlo ṭhin,mahse Pathian chakna rinchhan chunga engpawh kan hmachhawn thung erawh chuan, mihring in a theihna a hman zawh vek tawh hnu,a beidawn tawh hnuah pawh a rinchhan,a innghahna khan tho leh turin chakna a rawn pe dawn a,tha thar,rilru thar nen hmalam a pan leh thei zawk dawn a ni.

    Mihring hian amah mai chuan engmah tih theih a neilo. Penkhat lek pawh pen thiamlo hian mahni a thui tak kal kan tum ṭhin a,kawng chanve chu sawiloh,pen khat kan pen a,kan rahna fuhlo vangin kan tlu a,thawh dan kan thiam leh tawhlo a,tluksawp mai awl kan ti zawk thin,mahse nunkawng hruaitu ah leh innghahna atana Lungpui nghet nghing ve ngailo Pathian kan rinchhan tlat chuan kan tluk pawhin min kaitho leh anga,kan tum ram thleng turin min pui dawn ani...

    "Mi tichaktu ah chuan engkim ka tithei"
    "I rin chuan Pathian ropuizia i hmu ang" ❤️

    ReplyDelete

He post chungchanga i ngaihdan lo sawi ve rawh: