Health Minister hovin Mizorama hripui leng mek dinhmun thlirho

Aizawl | July 10, 2021: Nimin khan SAD Conference Hall, MINECO ah Mizorama COVID-19 hripui leng dinhmun thlirho a ni a, he hun hi Health & Family Welfare Minister Dr. R. Lalthangliana'n kaihruaiin, DM&R Minister Pu Lalchamliana, MOT Chairman Dr. ZR Thiamsanga, MLA, AMC Mayor Pu Lalrinenga Sailo, Addl. Chief Secretary Pu JC Ramthanga bakah COVID-19 dona kawnga hmalatu department hrang hrang hotute, Indian Medical Association, Medical Operational Team, Jt. NGO Coordination Committee leh Mizoram Kohhran Hruaitute Committee (MKHC), Local Task Force aiawhte an tel.

Nimin meetingah hian Mizorama COVID-19 vaccine pekchhuah tawh dan report ngaihthlak niin July ni 8, 2021 thleng khan Vaccine dose 644739 pekchhuah tawh niin, vaccine full dose la tawh mi 78006 an awm a ni. Electoral Roll thar ber atanga chhutin Mizoramah kum 18 chunglam Vaccine pek theih mi nuai 7.75 an awm a, tunah hian vaccine first dose la tawh zat hi 73% a ni a, second dose la tawh zat hi 40% (first dose la tawh zat atanga chhutin) a ni. July thla chhunga vaccine second dose pek ngai zat chu mi 1,60,720 an ni a, tun dinhmunah vaccine stock a awm that thu report a ni. Raipuarte tan karleh thawhtanni atangin vaccine pekchhuah tur a ni a, hemi atana inbuatsaihna hi tluang takin a kal mek a ni.

Mizorama Health department district then dana vaccine pek chhuah dan hetiang hi a ni : Aizawl West– 93%, Aizawl East – 92%, Serchhip – 79%, Lunglei – 69%, Kolasib – 67%, Siaha – 67, Mamit – 55%, Lawngtlai – 35%.

India hmarchhak State zinga vaccine pekchhuah dan chu hetiang hi a ni : Arunachal Pradesh – 63.8%, Assam – 29.3%, Manipur – 36.83%, Meghalaya – 38.7%, Nagaland – 37.5%, Sikkim, 95.2%, Tripura – 73.2%.

July 1 – 7 chhungin COVID-19 hri kai mi 2212 hmuhchhuah tawh an ni a. Positive hmuhchhuahte hi AMC area veng 77 leh AMC pawn khua/veng 129 ah an awm a ni. Hmuhchhuah zinga mi 2174 hi tualchhunga inkaichhawng an ni a, Mizoram pawn atanga rawn lut mi 28 an awm bawk a ni. Positive hmuhchhuah zinga a tam ber hi kum 21 – 30 inkar an ni a, kum 11 – 20 inkarin dawtin, pathumna chu kum 10 hnuai lam an ni. Positive hmuhchhuah zinga a tam ber chu inchhungkhura inkaichhawng niin, thenawmte nena intlawhpawhin an dawt a, thenrual leh lainate intlawhtawn atanga hri kai hi pathumna an ni.

Tun dinhmunah Mizoramah CCC 55 awmin khum 2737 a awm a, nimin tlai dar 3 thleng khan hri kai enkawl mi 1336 an awm a ni. CCCC 243 awmin khum 5099 a awm a, nimin tlai dar 3 thleng khan hri kai enkawl mi 818 an awm a ni. Paid CCC 2 (State Guest House leh Chaltlang Tourist Lodge) awmin khum 41 a awm a, hri kai enkawl lai mi 7 an awm a ni.

West Phailengah PPP mode in CCC ruahman a ni a, State Bank of India leh Goodwill Foundation tangkawpin he CCC-a thawktute rawihna leh mamawh chi hrang hrang an ruahman a ni tih tarlan a ni.

Vawiin meetingah hian Central Jail-ah COVID-19 hri kai enkawlna ward 6 siam a nih thu tarlan a ni a, khum 180 awmin tunah hian hri kai enkawl lai mek mi 144 an awm a, Central Jailah hian COVID-19 vaccine pek runpui buatsaih a ni.

India ram pawn hmun hrang hrang atangin oxygen concentrator 946 dawn tawh a ni a, oxygen concentratorte hi DCH bakah DCHC, CCC, CHC, PHC etc ah dan a ni a, CCCC ah pawh a tul anga hman turin hawh tir thin an ni a. LG Company in ZMC a COVID-19 third wave atana inbuatsaih nana ward siam meka mamawh hmanrua chi hrtang hrang Rs nuai 40 man hu an donate dawn thu tarlan a ni bawk.

Medical Operational Team on COVID-19 c huan ZMC leh IDSP, H&FW nena tangkawpa COVID-19 hri kaite dinhmun an zirchianna (qualitative & quantitative) report an peihfel tep tawh thu an tarlang a, school hawn tan tum a nih avang leh third wave ah naupangte an ngaihtuahawm dawn nia mithiamten an sawi avangin hripui laka school naupangte awmze nei zawka zirtirna pek dan tur an ruahman mek thu an tarlang bawk a ni.

COBID-19 hripui inkaidarh lo tura inzirtirna uar zawka kalpui tha tih a ni a, hemi atan hian electronic media te tanglai lehzuala hman a tul thu tarlan niin, Containment zone ah tun aia awmze nei zawka sample test kalpui a nih theih dan turte sawiho a ni bawk.