Health department-in UNICEF atangin Oxygen Concentration thahnem tak dawng

Aizawl | July 13, 2021: Mizoram Health Department chuan Nimin khan UNICEF atangin Oxygen concentrator 150 leh a kaihhnawih hmanraw dang a dawng.


Heng Oxygen concentrator-te hi sawrkar damdawi in lian leh damdawi in te zawkah te hman turin Mizoram H&FW dept tana a rawn pek niin NHM Mizoram-in an lo dawngsawng a ni.

UNICEF consultant kal chhuak ta Pu.R.Lalmuankima hnen atanga thu dawn danin, 2020-2021 chhungin CSR kaltlangin UNICEF hian Mizoram H&FW dept hnenah hian hridanna vaccine (Routine immunisation leh covid vaccine) vawn thatna tur Deep freezer, Ice Line refrigerator (ILR) leh hmun kilkhawr zawka vaccine kenkual na tur (vaccine carrier) man to leh tha chi thahnem tak  a lo donate tawh a ni.

June ni 30 khan UNICEF bawk hian RT-PCR khawl tha tak Zoram Medical college a hman turin a lo pe tawh bawk a. He RT-PCR khawl hian vawi khatah sample 90 lai mai a test thei a. Tin, he khawl hmang hian sample test ni khatah vawi 11 lai mai a tih theih nghe nghe a ni. Sample test result darkar khat leh a chanve chhunga a tih chhuah theih avangin Covid swab sample test kawngah nasa takin Mizoram Health Dept. a chhawk zangkhai a ni.

UNICEF hian Mizoram H&FW Dept. te technical support pe turin consultant leh staff dangte Mizoram-ah hian an lo post tawh thin a. H&FW Dept, Mizoram tan kawng hrang hranga hma la in, UNICEF nen hian thawh hona tha tak an nei chho reng a ni.   

UNICEF tanpuinate hi Mizoram H&FW Dept tan thil lawmawm tak a ni a, hengte avang hian Mizoram sawrkar aiawhin Dr. Eric Zomawia, NHM Mission Director, Mizoram chuan lawmthu a sawi a ni.

Post a Comment

He post chungchanga i ngaihdan lo sawi ve rawh:

Previous Post Next Post