A KE A TLIAK RAWP MAI!

July 11, 2021(Pathianni) zingah khan infiamna hming pu si, insualna ni zawk âwm tak UFC 264 Lightweight Final chu Las Vegas khawpuiah neih a ni a. He fight-ah hian Conor McGregor-a leh Dustin Poirier-a te chu an intum a ni. Rei pawh an inbeih hmain McGregor-a a che sual a, a ke hman thiam lam chu a ngalrekah a tliak ta rawp mai a, inbeih zui zel chi a nih tak loh avangin Dustin Poirier-a chu chak zawkah puan a ni ta a ni.


Conor Mcgregor-a hi pa tawng duh tak, hram tlahawlh tak, tawngkam chhe tak, a tumpuite anchhelawh hreh miah lo a ni a. Poirier-a laka a tlawm hnu pawh hian tawngkam talin a la bei zui ni âwm tak a ni. Poirier-a chuan, “A thil sawite kha ngaihthlak liam mai mai theih loh chin a thleng tawh. Thaha min vauna tawngkamte a hmang a, ‘Kuangah ka zalh ang che,’ tihte a nei a. Kan infiamnaah hian in tawng khum leh inchhan pawrte a theih a. Mahse, mihringpuite kan tawng khum dan tawk hi chu a awm ve a ni tih hi ka sawi duh,” tiin a sawi.

McGregor-a hi Catholic chhungkua atanga lo sei lian a ni a. Chutiang mi chu ni mahse Isua Krista chungchang a sawi duh dan hi a rapthlak khawp mai. “Isua Krista hi Mixed Martial Arts fighter ni ve ta se chuan ‘Mawl lutuk’ tih pahin ka hnek ang,” tih te, “Isuan hian ring chhungah min rawn hmachhawn ve se chuan ka theh chhuak ang,” tih te, “Isua meuh pawhin min hneh thei lo vanng,” tihte chu a sawi duh dan a ni a. “Mi tupawhin eng thil pawh hi pathianah an ngai thei alawm. Ka ngaihdanah chuan keimahni hi kan pathian chu kan ni thei mai alawm,” tiin Pathian a ngaihnepzia a sawi lang hmiah hmiah mai bawk.

Isua Krista chungchang a sawi duh dan hi mi tam takin an sawisel a. Chung zinga langsar tak chu Texas khawpuia Stedfast Baptist Church Pastor, Donnie Romero-a hi a ni. McGregor-a’n, “Isua Krista chu ka knock out ang,” tia a sawi chu a ngaithiam thei ngang lo va. “He khawvela mi tinrengin Bible hi an lo rin a, McGregor-a tlawmtirtu hi Isua ngei hi a ni tih an lo hriat theih nan Pathian hnenah he mihring chapo lutuk hi na taka nawr thlu tawp turin ka tawngtai dawn a ni,” tiin a thiltihtheihzia lantira McGregor-a chunga tuarna thlentir turin Pathian a ngen tur thu a sawi ta riap mai a ni. Mak tak maiin a tumpuite a pet thinna, a ke hman thiam lam chu a tliak ta hnawp mai a ni. Pi leh puten, “Anchhelawh hi mahni chungah a tla thin,” an tih chu ama chungah ngei a lo tla ta a ni.

An hunlai khawvela lal ropui ber ber Pharaoa leh Nebukadnezzara te chuan Pathian an ngainep a, an mualpho phah tawh a, zaithiam lar leh hmingthang John Lennon-a chuan Isua a ngaihnep avangin naupang têin khawvel a chhuahsan a, “Isua in tih hi ka mamawh ve lo ve,” titu Marilyn Monroe-i pawhin dawm hlumtu nei lovin khawvel a chhuahsan tawh bawk. Pathian thu awih hi a harsa hle a nih pawhin Pathian cho te, Pathian aia indahsan te, tawngkam chhe tleuh nana hmante hi upaten ‘Van ek khum tum ang’ an tih ang maia a pawizia a lan chhuah nghal chang a awm a, a lang nghal thut lo a nih pawhin tumah an tluang thei ngai lo. Kan chakzia, theihzia, ropuizia sawi fiah/tehkhin nana Pathian hman hi Pathian hmuhsitna a nih avangin mihringin a nghawng let an tuar zo ngai lo.

Pathian thu chuan, “LALPA i Pathian hming chu i lam mai mai tûr a ni lo; LALPA chuan a hming lam mai mai chu thiam loh chantîr lohvin a chhuah dâwn si lo va.” (Exodus 20:7) tih kan hmu a. He thu hi a la nung reng a, A hming lam mai maite chu Pathianin a bitum nghauh nghauh dawn tih hi a chiang em em a ni. Lal Isua chuan, “Chutichuan, nangni chuan hetiang hian tawngtai rawh u:- ‘Kan Pa vana mi, I hming zahawm rawh se.” (Matthaia 6:9) tia tawngtai turin min hrilh a ni. Pathian hming hi a zahawm a, zah taka lam tur a ni a, fiamthu thawh nana hman mai mai kan chingte pawh hi kan sim a ngai a ni.

*Pathian hi engkim siamtu, mihring pawh siamtu a nih avangin kan hmangaih tur a ni a, kan chawimawi tur a ni a, zahawm takin chibai kan buk thin tur a ni. Chutih rualin Pahianin duh taka a siam kan mihringpuite pawh anchhia kan lawh hauh tur a ni lo.*

- P.C.Vanlalrova

Post a Comment

He post chungchanga i ngaihdan lo sawi ve rawh:

Previous Post Next Post