Ticker

10/recent/ticker-posts

ZONUN ZE MAWI CHAWI SAN

- Chhakchhuak Entlinga

“Zonun Ze Mawi chu tawngkama hrilhfiah leh hla-a sak fiah chi ni lovin a nuna nunpui tura Pathian in Mizo hnam tana a bik taka min pek a ni”.




Kan pi leh pute khan zonun ze mawi hi an khawsak hona-ah nunpuiin ‘sem sem dam dam, ei bil thi thi’ an lo ti thin a. Thenawmte thlai leh an-tela in vawm tawnin khawchhungah eitur neilo, meialh en an awm bik ngailo. Sa, ral leh kangmei a lo chhuahin  thih ngam lu puin tlawmngai takin an khua leh tuite tan an thawkchhuak a, ‘dam leh tlang khatah, thih leh ruam khatah’ tiin, an khawtlang tan an tha leh tui an senga, an nunna hial pawh an khawhimna atana hlan huamin thing serh satin zonun zemawi an lantir thin.

Tunlai hunah ve thung chuan kan khawsak dante danglam chho zelin kan pi leh pute nunpui thin zonun ze mawi kha hmuh tur a tlem ta viau mai. Zonun ze mawi inzirtirna tia sawi theih zawlbuk a awm tawh lova, taimak inzirtirna leh intodelhna ber thlawhhma la tlem tial tialin, zualko kal a tul tawh heklo, mi hrang, sa hrang leh huai hun a liama, thim a kianga, Christianna hmangin eng in Mizo hnam chu a rawn hruai ta a ni ber. Mahse Christianna kan vawn rual khan kan hnam min ti mawitu zonun ze mawi kha kan hlamchhiah ta em ni? tih chu ngaihtuah tham tak a ni. _Zonun ze mawi hi christianna nen ain kalh lova, Christian nun dan tha ngaihsan nen hian a thuhmun zawk fo._
             Chhungtin khawsak leh eizawnnate chu kan pi leh pute hunlai ai kha chuan a hahdam ta hle mai, chutih rual chuan zonun ze mawi hi mizo hnam tana siam a ni talo em maw ni chu aw tih tur khawpin Khawtlang nunah zonun ze mawi hmuh tur a tlem tial tial a, hnamdang laka kan hranna leh kan danglam bikna; Pathianin a bik taka mizo hnam tana a siam, min pek chu a dal ta riau angah a ngaih theih awm e.

Mahse zonun ze mawi hi mizo nunah hian ral mai thei a ni lova, kan nihna, Pathianin  mizo hnam tan liau liaua Isua krista nun dan zemawi tak leh  christianna nena inhmeh em em tura min pek kan pian chhuah pui a ni. Hmanlaia Mizo nuna zonun ze mawi tak ang kha tunlai mite nunah pawh hian a la awm reng a, hmanlai hun angin hman chhuahna hun leh tih lanna hun erawh a tlem tawh thung. Khawvel changkanna avangin zonun ze mawi lantirna langsar tak ni thin ‘sa’ leh ‘ral’ a awm tawh lova. Khawsak a danglama, khawvel hranah kan cheng ta a ni ber, kan khawvel hman mek ruala ke penin mi tinte kan hmanhlel ta zawk a ni.
               Heng avang hian zonun ze mawi hi kan mamawh tawh lo tihna erawh a ni lo. Mizo hi chu a huhova cheng thin kan ni a, heng kan nun hona-ah leh kan awmna hmun theuhah hian zonun ze mawi lantir tu leh chhawmnung/chawisangtu kan nih zel a ngai. Thiamna a san ang zelin zonun ze mawi hi kan chawisan ve zel a ngaia, hnamdang karah pawh zonun ze mawi hi a hnawksak lova, hnamdang laka zahawmna min pe tu zawk a ni.

Kan tunlai hun hi han thlir ila zonun ze mawi a lan theihna hunah pawh kan hnam nun mawi tak hian palzam a hlawh em em a, Mizo hnam nun pela nun hmang kan pung tual tual thung, khawtlangah mawhphurhna nei velo anga inngai kan awm a, khawhar ina kal nachang hrelo leh lumen-naa kal ngailo, thlan laih pawh tum lo kan awm ta hial mai. Heng avang hian tunlai huna kan la nunpui theih leh kan mamawh em em zonun ze mawi hi chawisang tura kanin zirtir sauh sauh a ngai awm e.

He famkim lohna khawvel, mihring famkim lo te kan awm famkim tlat si-naah hian Pathianin’a min pek, kan duh emaw duh lo emaw zonun ze mawi pianchhuah puitu kan nihna hi inhrilhriaa inzirtir thar lehin, tawngkama hrilhfiah leh hla-a sak duh tawk mai lova a nuna nunpuitu nih theuh i tum thar leh ang u. Tichuan zonun zemawi chu chawisana awmin nunze mawi tak hmangin kan hnam hi kan dinthar leh dawn nia.
Post i hmuh dan

Post a Comment

0 Comments