ZIRNA LEH KHAWTLANG NUN

- Vanlalthansanga


Thuhma
Zirna leh khawtlang nun tih chungchang kan sawi dawn a ni a. Kan khawtlang nunah politics a in rawlh tlata, politics tel lovin khawtlang a kal theilo ang hian Khawtlang a awm rual rualin Zirna In a ding nghal zel mai a ni. Chuti khawpa pawimawh chu zirna hi a nih avangin khawtlang a awm chhung chuan zirna hi ngaihthah theih a ni dawn lova, a awm zel dawn a ni. A nihna takah chuan khawtlang a awm avangin zirna a awm kan ti thei ang. Chuvangin zirlai te hian keimahni mai bakah kan khawtlang tan kan zir tihna a nih chu.  

Zirna lo awm chhan
Khawtlang (society) chu mipui kalkhawm ina kan siam a ni a, chung mipui kalkhawm te chuan duh leh mamawh hrang hrang kan lo nei ta a, mipui kan tam poh leh kan duh leh mamawh pawh a sang chho zel anih chu. Mipui khawsak dan relna kawngah te, ei bar zawnna thu ah te, dam leh hriselna chungchangah te zirmi (mithiam) kan mamawh zel ang, mamawhna avangin zirmi te chuan an zira, khawtlang tan tangkai takin an thiamna te chu an hmang chhuak thin reng a ni. 

Zirlo mi aiin zirmi te chu an chhawrnahawm zel
Zirlo mite ai chuan a zirchhuakte chuan tangkaina an nei zawk zel thin a ni. Tuna kan khawtlang mai bakah hian hmun hrang hranga an khawtlang awmdan leh inrelbawldan te, an khawsak phung leh an hmasawnna, an changkan leh changkan loh te i thlir ve thin em? I la ngaihtuah ngailo anih chuan midang – hmundanga an khawsak dante zir ve thin la zirna pawimawh zia chu i hrethiam thei ang. Hmun hran hrana mi pawimawh leh mi tangkai tak tak te chu zirna avanga inzirchhuak midangte tana tangkai taka hnathawk mek te an ni zel a ni. Chuvang chuan khawtlang leh ram tana mi tangkai, chhawrtlak ni tur chuan kan zirthiama, kan zirchhuah ve angai ta a nih chu. Chuta kan zir te chu kan tuina lam a ni tawh anga, zir kan tum leh kan zir chak zawng chu a in ang vek kher lovang. Amaherawh chu kan zir ang ang chu hriatbel tum ila, khawtlang tan a ni tih rilru pu chunga kan zir chuan chhawrtlakin kan zirchhuak ngei ang tih ka ring a ni. Hei hi lo hre reng rawh, “taima taka i zir fan fan chuan tuna i awmna khawtlang kherlo ah pawh awm la, i awmna apiangah chu i awmna khawtlang tan chuan mi tangkai tak i ni zel dawn a ni” tih hi.


I hlawhtling lai hmel an hmu chak
Khawtlang nu leh pa ten i hlawhtling lai hmel an hmu chak em em a, nghakhlel takin an thlir reng che a ni. An tu leh fate zirna kawng in zawh mek hi an lawm thina, engtikniah emaw chuan mi chhawrnahawm, mi hlawhtling, ram leh khawtlang tan mi tangkai tak i nih an ring tlat a ni. I lakah beiseina sang tak an neia, chu an beiseina chu tithlawn lul suh ang che. An beiseina ang ngeia i hlawhtlin theih nan zirlai i nih chuan i zirnaah hlawhtlin tumin taima takin zir zel ang che. Nakina i hlawhtlin hunah chuan khawtlang mite mai bakah nangmah ngei pawh ila lawm dawn si a. 

Zirna hmanga khawtlang siam that
Khawtlang nuam leh changkang taka siam thei tu chu achhunga chengte chauh hi an ni a, hmun dang khawdangin kan khawtlang hi an rawn siam tha lo mai thei a ni. Chumi anih avangin chuan tun dinhmuna khawtlang i siamthat theih dan awmchhun chu zirna sang zawk zel bei tura rilru siam a ni. Amaherawh chu kan tuina lam anih loh chuan College kala University thlenga zuk zir pawh a ngai kher awm lo ve. College kal kherlo pawh hian technical lam te, job oriented lam hawi training tur leh zir tur tam tak awm tho a ni. Ka sawi duh tak zawka chu; eng line-ah pawh kal la, thiam tum la, bei ngawrh la, taima takin zirla, nu leh pa, chhung te leh khawtlang tana mi tangkai ni ngei turin zir ang che, chutianga kan zir phawt chuan khawtlang siamthatna kawngah ka thawk ve lo ti mah la, thawhna mual mual chu i nei tho ang. Zirna hi bansan lo la, zir zel turin inbuatsaih la, khawtlang, ram leh hnam tana mi tangkai nih tum ngei ang che.

Post a Comment

0 Comments