THAWNTHU TAWP DAN CHU KAN HRIA

 THAWNTHU TAWP DAN CHU KAN HRIA

- Rick Warren

- 30 June, 2021

“He Ram Chanchin Ṭha hi hnam zawng zawng hriattîrna tûrin khawvel zawng zawngah hrilhin a awm ang; chu mi zawhah chuan tâwpna chu a lo thleng ang.” Matthaia 24:14

Hmanlai chanchinah pawh khan tawpna chu a thleng zel.

Ka rilru zawng zawngin ka ring a. A niin ka hre bawka. A tawp tawh. A zo ta. Rinhlelh rual a ni lo. A bung tawpna ber ka chhiar mek a ni.

Pathian thu pawhin tawpna lo awm dan tur chu min hrilh a. Engtik niah emaw chuan Pathianin he khawvel hi a la zial fel dawna, tichuan a fate zawng zawng chu van inah kumkhua atan min hruai tawh dawn a ni. Bible chuan, “He Ram Chanchin Ṭha hi hnam zawng zawng hriattîrna tûrin khawvel zawng zawngah hrilhin a awm ang; chu mi zawhah chuan tâwpna chu a lo thleng ang,” a ti a ni. Matthaia 24:14

Thil pawimawh tak ka hrilh dawn che a ni. He leiah hian lalram kan din dawn lova. Van Lalram luah kan tum zawk a ni. Vanramah chuan kan ṭhiante leh mi zawng zawng kan zingah awm ve se kan ti zawk a ni. Kan tum chu midangte Pathian rama hruai a ni a, chatuanin Pathian kianga an awm ve theihna turin. 

Engtin nge Pathian ropuizia kan lantir? Kan thinlung zawng zawnga kan hmangaih hian a ropui ṭhin. Pathian chhungkuah chuan midangte kan hmangaih hian ani chu a ropui ṭhin. Hmangaih tlak lohte kan hmangaih hian Pathian chu a ropui ṭhin. Mi zawng zawng hnena Chanchin ṭha kan hril hian Pathian a ropui ṭhin. Thilmak chauh lo chuan kan nuna harsatna te min sutkian sak theih tawh dawn lo a ni tih kan hriat hnuah pawh Pathiana kan innghah tlat hian Pathian a ropui ṭhin. Tawpna hi lo thleng ngei tur a ni tih leh chutah chuan Pathianin hnehna a chang ṭhin tih kan hriata amaha kan inghah hian Pathian a ropui ṭhin.

Chutianga nun chu i duhzawng a ni em? A nih chuan, hetiang hian ṭawngṭai rawh le:

“Isua Krista duhawm, khawvela i hnathawhnaah hian tel ve ka duh a ni. Min hman ngei i duh pawh ka ring. Ka hmangaihna hmasa kha hlan let leh che ka duh a: kum zabi 21-na ah hian i kut leh ke nih ka duh a ni. I duhzawng chu ringa nung tura min pui turin Isua hmingin ka dil a che. Amen.” 

Han ngaihtuah la

Thawntu tawpna chu Pathianin a ziak tawha hnehna pawh a chang a ni tih ringtu i nih chuan i nunah chuan eng nge thlak danglam ngai awm le?

Harsatna sutkian hleih theih loh tawk ta la Pathiana inghah ngai i ti angem?

Pathian rama an lo tel ve theihna turin tunge Chanchin Ṭha vawiinah hian i hrilh ang le?

Mamawh i neih lai taka thil pek i hlauhna chhan chu eng nge ni? 

Eng pawh lo ti tawhin engtiang pawhin lo awm tawh mah la, engtik niah emaw chuan Pathianin a Lalrama tel ve turin a duh che a ni. Adik a ni, Pathian ramah chuan chatuana awm turin hmun i nei a Pathian chhungte chu an inpeiha an nghak reng che a ni. Chu sawmna chuan a huam zau em em a. Ring la lo dawngsawng tawp mai rawh.

I inpeih em? Hetiang hian tawngtai rawh le: “Aw Pathian, ka thih hunah chuan ka nunna chu i hnenah a awm dawn tih ka hria a. I lakah thil ka lo tisuala, nangma duh dan ni lovin keima duh danin ka lo nung ṭhin a. Chu chu tunah hian inthlak danglama, bul ṭan thar ka duh a. Ka sualna te hi hawisana i hnen lam lo hawi ka duh a ni.  

Isua chu mi zawng zawng aia thi tura i rawn tirh avangin ka lawma, ka thiltih sual te avanga hremna ka hmuh tur chu ka pumpelh phah a ni. Min ngaihdamna chu ka phu lo a ni tih ka hria. Lalpa, i khawngaihna chauh chuan min chhandam thei a ni tih ka hria. Famkimna hmuna tel tur chuan ka ṭhatna hian a tlin ngai dawn lo a ni tih ka hria.

Isu, min hmangaih em avanga ka sualna te i inbel vek avangin ka lawm e. Vanrama lut ve tlakah min siama, chuvang chuan khawngaiha min chhanchhuak turin ka dil a che. Isu, ka ring che a. Min chhandamna chu vawilehkhatah, famkimin, chatuan thlengin min tiam angin a nih ka ring e. He Lei hi ka chhuahsan hunah pawh, i Lalramah chuan ka lo zawm ve ngei ang che tih ka ring e. Isua hmingin ka dil e. Amen.”

A chunga mi ang khian i ṭawngṭai a nih chuan, hetah hian min lo hrilh ang che – Rick@PastorRick.com. Isua nena hun i hman zel theih nan thil tangkai tur ka lo thawn ang che. 

Lettu: Sangpuia

Post a Comment

0 Comments