Kolasib | June 10, 2021: Serlui bialtu MLA Pu Lalrinsanga Ralte, Rubber & Allied Crops Development Board Vice Chairman nibawk chuan a bial chhung mi, Covid-19 hri kaite hnenah kanna thilpek a hlan chhunzawm.
Pu Lalrinsanga Ralte chuan vanduaina tawk, a bial chhung mi Covid-19 positive mekte'n an hriselna an inenkawlna kawnga an mamawh tur Immunity & Protection Kit chu siamin Jordan Centre, Sethawn CCC-ah mi 100 daih tur a pe leh a. He Immunity & Protection Kit chhungah hian Vitamin C, Multi Vitamin, Immunity Booster, Paracetamol, 3 Ply Mask, ORS leh Hand Sanitizer te awmin tui thianghlim an in theih nan Mineral Water thahnem tak a pe bawk a ni.
Rubber & Allied Crops Development Board Vice Chairman chuan hripui leng mek karah a bial chhung mipuite fimkhur tur leh Sawrkar leh VLTF inkhaihhruaina te thuawih taka zawm turin a chah a, “Heng inkhaihruainate hi mahni leh kan chhungte tan, kan khawtlang kan him theihna tur a ni,” a ti. Bialtu MLA chuan bial mipuite hripui leng avanga harsatna tawk an awm leh awm lohte lo ngaihven a lo thlithlai reng turin a bial chhung khawtin VLTF te chu chahin harsatna tawk an awm a nih chuan amah hriattir thuai thin turin a hrilh bawk.
Pu Lalrinsanga Ralte hian Dt.12/05/2021 khan Sethawn CCC-ah hian Serlui bial mi Covid 19 Positive vanga enkawl mekte tan Immunity & Protection Kit a siam hi packet 100 a lo dah tawh bak ah Mineral Water Case engemaw zat a lo pe tel tawh bawk a ni. Heng thilpek te hi bialtu MLA aiawhin Pu Lalrinthara Vangkeu, Bilkhawthlir chuan Dr.C.Lalhlimpuia, Medical Officer hnenah a hlan a ni.
- DIPR
Scan to Donate for this website
Post a Comment
He post chungchanga i ngaihdan lo sawi ve rawh: