Sawrkar enkawl sikul-ah admit fee 30%-a tihhniam a ni dawn - Lalchhandama Ralte

Aizawl | June 7, 2021: “Sawrkar enkawl school-ah admission fee zaa 30-a tihhniam a ni dawn” tih Education Minister Pu Lalchhandama Ralte chuan vawiin khan Govt. Mizo High School tualzawla programme buatsaihah a sawi. Govt. Mizo High School chuan an school atanga HSLC top ten-a tling leh subject topper an neihte chawimawina hun an buatsaih chu School Education Minister Pu Lalchhandama Ralte leh Pu C.Lalmuanpuia Bialtu MLA ten an hmanpui a ni.

School Education Minister chuan he hunah hian thusawiin zirlai titha chawimawi tlakte chu a lawmpui thu leh kawng laka tlu mai lova ram leh hnam mamawh chhanna ni turin a fuih. Govt. Mizo High School chu Missionary te din anihna a lang zel a, a bul tantute inpekna vawn nun anih zel avangin a lawmawm a. Govt High School atanga top ten awm chhun kan neih pawh he school a ni hi a inhmeh hle a ni a ti. 

Minister chuan Mizoram-in hripui avanga hun harsa a tawn mek avangin sawrkarin a enkawl, zirtirtute hlawh a pek school - Govt school, Adhoc Aided, Deficit leh lumpsum school HIgher Secondary school-ah te Class XI admission fee chu school-in an lo lak thin zat atangin zaa 30-a tihhniam a ni dawn a ni a ti. Mimal school dinte pawh ram mipuiin harsatna kan tawk tih hriaa admission fee hi lo titlem ve turin a sawm nghal bawk.

Minister chuan nu leh pate chu an chhungkaw sum leh pai lakluh mila an fate zirna ngaihtuah turin a sawm a, mimal sikul thlatina man chawi ngaia luhtirte chu fee pe thei tura ngaih an ni a, luh tawh hnua fee chawi tur zat tihtlem leh phut ai chuan a thlawna zir theihna, sawrkar school tha tak tak a awm thu leh zirtirtu pawh qualified an nih bakah chhuanawm tak tak an awm thu a sawi a, mahni chhungkaw mila school luhna thlan a tul thu a sawi bawk.

Minister chuan zirlaite chu nakkumah pawh a hun taka Exam hmachhawn leh thei turin inbuatsaihna an neih ang ang hmang tangkai turin a chah a. Kum tharah result tha zawk an neih theih nan he hun thim an hman mek hi hun rangkachaka siam tum turin a chah a ni.

Minister chuan HSLC result 2021-ah pakhat mah pass awm lohna school 7 an awm a, chung zinga 1 chu sawrkar school a ni tih sawiin heng school-te hi insawifiah tura hriattirna pek an nih thu a sawi bawk.

Pu C.Lalmuanpuia Bialtu MLA pawhin he hunah hian thusawiin khawvelin hun harsa a tawh lai leh India ram state dangin Board Exam an neih theih loh laia HSLC result tha tak kan nei thei chu kan Minister remhriatna leh huaisenna avang a ni tih sawiin hei hi a ropui hle a ni, a ti a. Vengtin leh khawtinah zirtirtute chu an smart a, midangte entawntlak an ni thin tih sawiin hei hi chhunzawm zel turin a chah a ni.

Govt Mizo High School hian HSLC result chhuak taah khan Exam hmachhawn 295 an nei a,  zaa 93.56 in an pass a. An zirlai Lalnunmawii chu a pumpuiah 10-na a ni a, Lalsangpuii leh C.Lalramngaihzuali te chu  Social Science-ah topper an ni. Top ten-a tling Lalnunmawii hi chawimawi nan laptop an hlan a, subject topper pahnihte hi tablet an hlan bawk.

Govt Mizo High School-in zirlai tithate chawimawina hun an buatsaihah hian Mizoram Secondary School Teachers Association (MISSTA) chuan Video clip tutorial an siam clip 182 chu Mizoram chhung hmun hrang hranga zirlaiten an lo hman tangkai turin Minister hnenah hian an hlan a. Heng video clip te hi Class IX leh X Mathematics a ni a, a pawimawh lai lachhuakin zirtirtuten nikuma school kal theih loh chhung khan an siam a ni.  Pu Zorammawia Vice President MISSTA chuan heng video clip youtube a upload vek tawh link te hi Minister hnenah a hlan a ni.

Minister hian Govt Mizo High School Hall tur cheng nuai 495 senga sak mek chu a hmunah a tlawh nghal a. He hall hi chhawng thuma sak tur a ni a. Basement leh first floor te chu parking atan hman a ni ang a, car 40 leh two wheeler 51 a dah theih dawn a, second floor chu hall atan hman a ni dawn a ni.

Govt Mizo High School-in Zirlai tithate chawimawina hi an school tual zawlah an buatsaih a. School Education Minister Pu Lalchhandama Ralte, Pu C.Lalmuanpuia Bialtu MLA, Pu James Lalrinchhana Director ten an hmanpui a. Headmaster, zirtirtu leh zirlai tlemte ten sorkar  inkaihhruaina zawm chungin he hun hi an hmang a ni. 

- DIPR