RT-PCR bunna tur sak tum mek 'mipui bum tumna mai niin a lang' - BJP Mizoram Pradesh spokesperson K Laldinthara

Miretheite leh dinhmun harsa zawk ten tun hnaia Mizoram puma a thlawna Buhfai kan dawn theihna chhan pawh hi Central sorkar Pu Modia ruahmanna  liau liau a ni 

Aizawl | June 19, 2021: BJP Mizoram Pradesh spokesperson K Laldinthara chuan, "India Ram puma Covid-19 hripui thawh hnihna leng mek chuan ziaawm lam a pan hret hret a, hetih lai hian Mizoram dinhmun erawh chuan zia awm lam a pan thei meuh lo." a ti a.

"State dangten hripui  an hneh chhoh zel laia keini state a Covid hri apung tulh tulh zawk ni a lang  hi en liam mai chi niin a lang ta lova. Keini BJP- Mizoram Pradesh te pawhin kan theih tawkin kan zirchiang a, sorkar hnenah pawh thurawn kan lo pe ve tawh bawk a ni." a ti bawk.




1) Tun hnaia High Court lamin Lunglei RT- PCR dinna tur chungchang a thupek a tihchhuah avangin chawpchilh takin RT-PCR bunna tur, insakna tur a han lai rum rum a. (A nihna takah chuan DoNER/NEC ah a in sakna tur an dil mek chauh a ni si a) Ruahmanna state sorkarin a  siam ang hi chuan, a rang thei ang ber a chhun zan zawm a bei pawh nisela, hun a la duh rei dawn hle a ni. Hei hi mipui bum tumna mai niin a lang a ni.

2). Hrikai ten mi dang an kaichhawn leh hma a hriatchhuah thuai thuai hi he hrileng chhutchahna tura tih makmawh-ah kan ngai a. AMC area leh  District headquarters tin bakah Containment zone a puan apiangte hnenah "Random Test" neih ngei a tul tawh kan ti a ni.

Hrikai leh kai lo sample  endikna rintlak ber chu Real Time PCR hi a ni a. RT PCR hi bun mai a harsat thu state sorkar lamin an sawi reng avangin, Zoram Medical College (ZMC) in hun rei tak an lo hawh sak tawh College of Veterinary and Animal Husbandry (Vety College), Selesih a RT-PCR hman a nih dante tun hnaiah BJP- Mizoram Pradesh chuan kan han enfiah a. Central Agriculture University (CAU) hnuaia College, Selesih a RT-PCR an hman dan leh an bunna hmunte kan tlawh a, mithiam ten min hrilhfiah danin. RT-PCR hi room zau pangngai ve deuhah chuan harsa lo taka bun mai theih niin a lang a. 

Tin, Covid sample lakte vawn thatna chungchanga harsatna awm nia sawi pawh thil harsa niin a lang lo, Sample an lak, -20C vela vawn reng ngai hi hautak hle anga tarlan pawh hi thu belhchian dawl lutuk lo niin a lang a, Mizoram chhunga Vety College-ah hian endik tur vawn thatna khawl, -80 C thlenga tih vawh theih engemaw zat an kawl a, corridor-ah te an bun mai mai a ni.

Tin, tunhnaiah Laboratory din turin Bio Level (BL)-II pawh Covid endikna atan phal a ni tawh niin a lang a, State khat sorkar ve riang ruang tan chuan hetiang Laboratory neih hi  harsa tur niin a lang lo a ni. Vety College a RT-PCR hi DNA atanga hri hmuhchhuahna a ni a, Covid hri hmuh theihna RNA hmang tur hian hmanraw pakhat chauh neih belh ngai a ni.

RT-PCR khawl viltute leh enkawltu tur hian mithiam neihte chu a tul tak meuh a, Mizoram sorkar hian Vety College a muster roll a thawklai hmeichhe pakhat chu, Mizoram sorkarah hna nghet pein RT-PCR khawlvil tur hian an ruai nghal tih te kan hria a. Hetiang sorkar hna nghet hmuh theihna  tur a nih chuan RT-PCR khawl viltu tur mithiam tam tak lakluh nghal tur pawh an awm ngei ngei turah kan ngai bawk a ni.Tun dinhmunah hian RT-PCR dinna tura hmun zau tak tak, building lianpui emaw a tul ber lovin a lang a. State dangten Mobile RT- PCR an hman tan tawh lai hian Mizoram sorkar hian a tih tur a ti tawk lo niin BJP- Mizoram Pradesh chuan kan ngai a ni.

Central sorkar Pu Naredra Modi kaihhruai hian india ram pum huapa hripui leng dotu atan hma a lakna hi BJP- Mizoram Pradesh chuan lawmawm kan tiin kan chhuang tak zet a. Miretheite leh dinhmun harsa zawk ten tun hnaia Mizoram puma a thlawna Buhfai kan dawn theihna chhan pawh hi Central sorkar Pu Modia ruahmanna  liau liau a ni tih hi hre thar ila. Pu Zaramthanga kaihhruai, MNF sorkar thil tih a ni lo tih hi Mizoram mipuite hriatah kan han puang nawn leh a, State Sorkar pawh hian miretheite tana Central sorkar hmalakna-ah hian lawmthu sawi hi an tih ve ngei ngei turah BJP- Mizoram Pradesh chuan kan ngai a ni.

Covid -19 hripui laka invenna Vaccine kum 18 chung lam tan kan mamawh ang zelin Central sorkarin a thlawnin min pe mek a, Mizoram mipui  a tam thei ang berin Covid Vaccine hi kan lak hi a tul kan tiin, la thei te chuan la vek turin kan sawm bawk a ni.

Heng a chunga kan han sawi bakah hian tun hnaiah PM Cares Fund hnuaiah Oxygen plants tam tham tak kan state in kan dil pawh ni hauh lovin Central sorkar Pu Modi a kaihhruai chuan min rawn allocates leh a, hei hi kan state pachhiat zia leh harsatna tawk mai thei dinhmuna kan din vanga pek kan ni tih kan sawi duh bawk a ni.

Post a Comment

0 Comments