REMNA NI A LO THLEN HIAN

- Remmuana Chawngthu

      Remna ni (30 June) kan lo thleng leh ta, he ni hlutna hi ṭhangthar chhuan lo awm mekte  leh la awm zel tur ten a hlutna an hriat zel theih nan theihtawp chhuah zel hi a pawimawh zual ta hle a ni.

"Felna rah chu remna siamtute tan remnain tuh a ni."  (Jak 3:18)

Pathian thu aṭangin.

      "Inremna tura sual thawina thisen chuan, kum tin vawi khat in thlahte thlengin a siam ṭhin tur a ni. Chu chu Lalpa tan thianghlim tak a ni..." (Exo 30:10).

      Kan Bible-ah hian inremna pawimawhzia chiang tak takin kan hmu a, ringtute chu midangte laka remna siamtu ni tura beisei kan ni.

    Mahse, mihring mihrinna aṭang chuan thil har tak mai, mi nazawng tan tih hleih theih loh khawpa harsa pawh a nih chang a awm awm e.

Tlang chunga Isua thusawi pawimawh zingah remna siamtute chan ṭhatzia a sawi a. Chutih rual chuan, Lalpa ten/huat zawng tak zingah "unau kara inrem lohna tuhtute" an tel a ni (Thuf 6:19).

Lei leh van inrem theihna tura Isua thisen chhuak hlutzia te hre thar bawk ang u. 

Zofate tan vawiin hi

             Thawnthu hlui a thar leh ṭhin a; hliam hlui pawh hi ser nung a nih tawh chuan a dam mawh viau zel a ni.

     Remna Ni kan lo thleng leh ta e, remna chibai i inbûk mawlh mawlh ang u.

      *Zofaten zalênna sãng zawk kan neih theih beisei a, a remhriatna leh theihna sang tak sawrchhuak a, kan hnam tana thawk tura mi tam tak hruai khawmtu _Pu Laldenga leh a thawhpui zawng zawngte_ thinlungin lo hre thar leh se la.*

_Remna kan neih theihna tura harsatna kara thapui thawh a, hun khirh tak kara ring rawlhtute- Kohhran hruaitu, tlawmngai pawl hrang hrang leh zirlai pawlte hnathawh i hre thar leh mawlh mawlh ang u._

*Hnam sipai, hnam tana an nunna hlu tak ram leh hnam tana hlantute, zahna chibai buk thar leh ṭheuh chungin, tuna la dam te pawh i ngaihlu thar leh ang u.*

*Chung bakah, heng mite pawh hi i theihnghilh bik lo bawk ang u...*

1. *Pu Lal Thanhawla* :-

       Kum 1984 inthlanpuia hnehna changtu, _"Remna kan neihna tur a nih dawn phawt chuan second khat pawh inngaihtuah lovin lalthutthleng ka kian nghal ang"_ titu, a hnu Interim sorkara Deputy C.M ni zui ta tho si.

*2. Rajiv Gandhi leh Pu Lalkhama*:-

     Remna ziah laia India ram Prime Minister leh kha tih laia Mizoram Chief Secretary -Pu Lalkhama.

*3. Pu Lalduhoma* :-

        Khatih hunlaia Mizoram congress president, remna a awm theihna tura a eizawnna hna,  dinhmun pawimawh tak tak chân nia an sawi..

*4. Minister hlu tak pathumte*:-

 Pu Rokamlova (L)

 Pu Hiphei (L)

 Pu Liansuama

     Remna a awm theihna tura lalthutthleng kiantu dik tak mi pathum te an ni. An minister nihna, an department chan lai zawng zawng pawh kalsan vek a, midangte tan kiantu, heng mite hi an ngaihsanawm zual bik hle a ni.

A hranpaa han inchhuang fâl tur an lo awm lo ve, he remna thlenna tur hian. Mizoram mipui zawng zawngte ṭanrualna a ni.

ṬANRUAL HI CHAKNA A NI

He hun duhawm tak hi hlim takin i hmang theuh ang u...