Aizawl | June 1, 2021: North East zirlai (a bikin university zirlai) intelkhawmin NCERT zirlaibu-ah North East chungchang chapter khat dah tura nawrna turin June 4 tlai lam dar 6 atanga zan dar 8 chhung hian #AchapterforNE leh #NortheastMatters hmangin Twitter Storm kalpui a ni dawn.
He Twitter storm-ah hian, "We demand a place in NCERT syllabus' tiin twitter storm hashtag pahnih #AchapterforNE leh #NortheastMatters tih chu kalpui mek a ni. June ni 4 dar 6-8 inkar hian NE India history a twitter storm lian ber kalpuian tum a. NE zirlai zawng zawngte chu he hun hmanpui tur hian an insawm a, twitter-ah hashtag #AchapterforNE leh #NortheastMatters hmangin NCERT syllabus a NE tana chapter thar kai ngei an tum a ni.
He thil hi NE mite chunga hleihlenna leh diriamna awm ṭhin-ah hian central India lamin NE an lo hmelhriat theih nan CBSE zirlaibu ah chapter khat tal NE chungchang dah tura nawrna a ni a, chu chu an tum ber a ni. He huna tel a, twitter ah post siam tur hian zirlaite chuan an thiante an sawm a, zirlai rual an tangrualin an inlungrual hle a ni.
He hmalakna-ah hian Northeast mai bakah India ram hmun hrang hranga University zirlaite an tel a, North East zirlai intelkhawm hmalaknaah Mizoram University (MZU) Students' Council pawh an tel ve a ni.
North East state a university hrang hranga zirlai pawlte an intelkhawmna-ah hian Mizoram University Students Council pawh an tel ve a, Hemi chungchanga EXPLOREMIZORAM.COM zawhna chhangin MZU Students' Council president David Lalrinchhana chuan, "India ramin zalênna a hmuh atangin India mi nia chhinchhiah kan ni a. Kan ram leilung leh ramngawte hi India ram chhung tiin India map a rin luh a nihna kum tam a vei hnu pawhin a michengte hi rinluh tel kan la ni famkim lo tak zet a." a ti a, "Khati khawpa inlak hran kan tum chung pawha min seng lut ta sa sa, kan hmel a danglam avang te, kan sakhua a inan loh avang te, kan vunrawng leh mit thlenga a danglam avang mai tea inenhranna a awm thin hi a tha lo tak zet a. He hmalaknaah hian MZUSC chuan kan thenawmte hi kan thurualpui hle a, NCERT syllabus a North East chapter a awm ngei kan duh a. Mizoram University-a zirlai zawng zawngte leh Mizo mipuite he hmalakna hi thlawp a, June 4 zan dar 6-8 chhung hian twitter storm, (#AchapterforNE & #NortheastMatters) hmanga min tawiawm theuh turin ka sawm che u a ni." a ti.
He hmalakna chungchangah hian North East Students Organisation (NESO) finance secretary Ricky Lalbiakmawia chuan, "A va tha em!! A tha lutuk. NESO Pawhin kan vei em em a nia, Mainland Indian hovin kan chungan hleihlenna hrang hrang an chelek thin a, min discriminate a, kan state an hre tha duhlo a, india mi ni ah min pawm duh ngailo a, chutiang avang chuan NESO pawhin hma la in Harsatna hrang hrang kan mi leh sa ten an tawh thin avangin Delhi ah te kan kal a, sorkar hotute kan nawr thin a. Tin, Delhi leh Guwahati ah te hetiang thil thleng duhloh na au puiin kawng hrang hrangin hma kan la thin a ni e, tunah Chutiang tih reh theihna tur kawng khat CBSE zirlaibu ah North East chungchang telh tura hmalawkna awm hi thil lawmawm tak niin telh a nih chuan Mainland India ho pawhin min hriat chian phah anga mi hrang angin min enloh phah thei dawn a ni." tiin a ngaihdan EXPLOREMIZORAM.COM a hrilh.
Mizo Students' Union General headquarters president J Lalmuanzuala chuan, "NE chungchang hi NCERT zirlaibu a dah a nih theih chuan a ṭha ka ti khawp mai a, dah a nih theih nana hmalatu te an fakawmin, MSU chuan fullsupport kan pe tlat dawn a ni." a ti a. "7 sister te hi India ram hmun dangah hian enhran leh thlir bik kan ni a, Indian ni ve lo a min ngaitu tam tak an awmin, khawi ram aṭang lo kal nge i nih tih zawhna hi kan dawng fo ṭhin. Kan Indian puite lak aṭanga zawhna kan dawn tam tak hi chhana a awm theih nan, Northeast ah hian tute nge cheng a, eng hnam leh eng ang hmel pu nge an nih tih hriat theihna tur zirlaibu a a awm hi thil ṭul tak a ni." tiin EXPLOREMIZORAM.COM hnenah a ngaihdan a sawi.
MZP President B Vanlaltana chuan, "Ngaihdan vak pawh ka nei hran lo, mahse, central India leh northeast te hian culture leh tradition ah danglamna kan nei a, he kan culture leh tradition hi han dah lan ve chu tha ka ti," tiin EXPLOREMIZORAM.COM a hrilh.
#AchapterforNE #NortheastMatters
Post a Comment
He post chungchanga i ngaihdan lo sawi ve rawh: